បំណែកដ៏ធំមួយនៃផ្ទាំងទឹកកនៅលើភ្នំអាល់ ប្រទេសស្វីស បានបាក់ស្រុតកាលពីថ្ងៃពុធ បណ្តាលឲ្យហូរទឹកកក ភក់ និងដុំថ្មកប់ភូមិលើភ្នំ Blatten ដែលត្រូវបានជម្លៀសខ្លួនមនុស្សចេញ ។

អ្នកស្រីវេជ្ជបណ្ឌិត Mylene Jacquemartដែលជាអ្នកជំនាញខាងទឹកកកនិយាយថា ក្នុងរយៈពេល ២សប្តាហ៍កន្លងមកនេះ ពួកយើងបានសង្កេតឃើញរួចទៅហើយពីអស្ថិរភាពរបស់ដុំថ្មធំៗ ។

ក្រុមមន្រ្តីនិយាយថា បច្ចុប្បន្នមនុស្សម្នាក់កំពុងបាត់ខ្លួន ។ រូបភាពវីដេអូឃ្លីបដែលត្រូវបានចែករំលែកនៅលើបណ្តាញព័ត៌មានសង្គម ឃើញពេលដែលផ្ទាំងទឹកកកបាក់ស្រុតដោយអន្លើរ បង្កើតបានជាសុំផ្សែងដ៏ធំមួយគ្របពីលើចំហៀងភ្នំ ពេលដែលដុំថ្ម និងកម្ទេចកម្ទីធ្លាក់ចុះលើភូមិ Blatten ។

លោក Stephane Ganzer គឺជាមន្រ្តីមួយរូបនៅសង្កាត់ Valais ជាកន្លែងដែលភូមិ Blatten ស្ថិតនៅ និយាយប្រាប់សារព័ត៌មានស្វីសថា ប្រហែលជា ៩០ភាគរយនៃភូមិគ្របដណ្តប់ដោយបំណាក់ផ្ទាំងទឹកកក ។

ក្រុមមន្រ្តីនិយាយថា ដុំថ្ម និងដីរាប់លានម៉ែត្រគូប បានធ្លាក់ចុះ ចាប់តាំងពីភូមិ Blatten ត្រូវបានជម្លៀសមនុស្សចេញជាលើកដំបូងក្នុងខែនេះ ពេលដែលចំហៀងភ្នំនៅពីក្រោយផ្ទាំងទឹកកក ចាប់ផ្តើមប្រេះបែកខ្ញែក បង្កឲ្យមានការព្រមានថា វាអាចបណ្តាលឲ្យបាក់ផ្ទាំងទឹកកក ។

អ្នកស្រី Mylene និយាយប្រាប់ទីភ្នាក់ងារព័ត៌មានរ៉យទ័រថា នៅទីបញ្ចប់ទឹកកកនៅលើផ្ទាំងទឹកកក និងដុំថ្មដ៏ធំដែលជាប់ផ្ទាំងទឹកកក បានធ្លាក់ចុះក្រោម ។

ស្របពេលដែលអ្នកស្រីមិនអាចនិយាយឲ្យច្បាស់ថាបញ្ហាបម្រែបម្រួលអាកាសធាតុបណ្តាលឲ្យកើតមានឧបទ្ទេវហេតុនេះ អ្នកស្រីនិយាយបានថា រឿងពិតមួយបានកើតឡើង គឺការឡើងកម្តៅផែនដី ។

ក្រុមអាជ្ញាធរនិយាយថា អគារ និងហេដ្ឋារចនាសម្ព័ន្ធនៅក្នុងភូមិដែលអ្នកស្រុកប្រហែល ៣០០នាក់ ត្រូវបានជម្លៀសចេញកាលពីថ្ងៃទី ១៩ ខែឧសភា បន្ទាប់ពីអ្នកភូគព្ភវិទូបានរកឃើញហានិភ័យនៃការធ្លាក់ផ្ទាំងថ្ម និងទឹកកកពីខាងលើនោះ ត្រូវបានបំផ្លិចបំផ្លាញដោយសារការរមៀលដុំថ្ម ៕