មន្ត្រីយោធាជាន់ខ្ពស់ប៉ាគីស្ថាន បានប្រាប់សារព័ត៌មាន Reuters នៅថ្ងៃសុក្រ (ទី៣០ ខែឧសភា) នេះថា ប៉ាគីស្ថាន និងឥណ្ឌា ជិតបញ្ចប់ការបន្ថយចំនួនកងទ័ព នៅតាមព្រំដែនរបស់ប្រទេសទាំង២ ឲ្យដល់កម្រិតនៅមុនពេលដែលប្រទេសជិតខាងប្រដាប់អាវុធនុយក្លេអ៊ែរផ្ទុះជម្លោះក្នុងខែនេះ តែយ៉ាងណាក្ដី លោកបានព្រមានថា វិបត្តិនេះបានបង្កើនហានិភ័យនៃការកើនឡើងនូវភាពតានតឹងនាពេលអនាគត។

គួររំលឹកថា ភាគីទាំង២ បានប្រើប្រាស់យន្តហោះចម្បាំង មីស៊ីល យានដ្រូន និងកាំភ្លើងធំ អំឡុងការប៉ះទង្គិចរយៈពេល ៤ថ្ងៃ ដែលជាការប្រយុទ្ធគ្នាដ៏អាក្រក់បំផុតរបស់ប្រទេសទាំង២ ជាលើកដំបូង ក្នុងរយៈពេលជាច្រើនទសវត្សរ៍មកនេះ មុនពេលបទឈប់បាញ់ត្រូវបានប្រកាសឡើង។

ការបញ្ឆេះឲ្យមានការប្រយុទ្ធចុងក្រោយបង្អស់ រវាងគូសត្រូវចាស់នេះ គឺដោយសារការវាយប្រហារកាលពីថ្ងៃទី២២ ខែមេសា នៅតំបន់កាស្មៀរគ្រប់គ្រងដោយឥណ្ឌា ជាហេតុកាណ៍ដែលបានសម្លាប់មនុស្ស ២៦នាក់ ភាគច្រើនជាអ្នកទេសចរ។ ទីក្រុងញូវដេលី បានទម្លាក់ការទទួលខុសត្រូវ ចំពោះឧបទ្ទវហេតុនេះ ទៅលើ «ភេរវករ» គាំទ្រដោយប៉ាគីស្ថាន ជាការចោទប្រកាន់ដែលត្រូវបានបដិសេធដោយទីក្រុងអ៊ីស្លាម៉ាបាដ។

កាលពីថ្ងៃទី៧ ខែឧសភា ឥណ្ឌាបានបាញ់មីស៊ីលឆ្លងកាត់ព្រំដែនសំដៅទៅលើអ្វីដែលខ្លួនបាននិយាយថា ជាទីតាំង «ហេដ្ឋារចនាសម្ព័ន្ធភេរវករ» ហើយខណៈដែលប៉ាគីស្ថានបានឆ្លើយតបជាមួយនឹងការវាយប្រហារផ្ទាល់ខ្លួន ប្រទេសទាំង២ បានបង្កើនកងកម្លាំងបន្ថែមនៅតាមព្រំដែន។

លោកឧត្តមសេនីយ៍ Sahir Shamshad Mirza ដែលជានាយសេនាធិការចម្រុះរបស់ប្រទេសប៉ាគីស្ថាន បាននិយាយថា យោធាទាំង២ បានចាប់ផ្តើមដំណើរការកាត់បន្ថយកម្រិតកងទ័ព។ ក្នុងនាមមន្ត្រីយោធាជាន់ខ្ពស់បំផុតរបស់ប៉ាគីស្ថានដែលនិយាយជាសាធារណៈ គិតចាប់តាំងពីមានជម្លោះ លោក Mirza បានបញ្ជាក់ថា៖ «យើងស្ទើរតែបានត្រលប់ទៅស្ថានការណ៍ដូចដើម នៅមុនថ្ងៃទី២២ ខែមេសា។ យើងកំពុងខិតជិតដល់ចំណុចនោះហើយ ឬក៏យើងត្រូវតែទៅឲ្យដល់ចំណុចនោះ នាពេលនេះ»។

ក្រសួងការពារជាតិរបស់ឥណ្ឌា និងការិយាល័យរបស់ប្រមុខការពារជាតិឥណ្ឌា មិនបានឆ្លើយតបភ្លាមៗនោះឡើយ ចំពោះសំណើរបស់សារព័ត៌មាន Reuters ដើម្បីសុំការអត្ថាធិប្បាយ ជុំវិញលើកឡើងរបស់លោក Mirza នេះ៕