លោកប្រធានាធិបតី Aleksandar Vucic បាននិយាយថា ប្រទេសស៊ែប៊ី និងរុស្ស៊ី នឹងធ្វើការស៊ើបអង្កេតរួមគ្នា អំពីថា តើដែលគ្រាប់រំសេវផលិតដោយស៊ែប៊ីបានទៅដល់អ៊ុយក្រែនដោយរបៀបណា បន្ទាប់ពីទីក្រុងមូស្គូបានចោទប្រកាន់ទីក្រុងបែលក្រាដ (Belgrade) ថា បាននាំចេញអាវុធទៅឲ្យរដ្ឋាភិបាលទីក្រុងគីវ។

SVR ដែលជាទីភ្នាក់ងារចារកម្មបរទេសរបស់រុស្ស៊ី បានចោទប្រកាន់ទីក្រុងបែលក្រាដថា បាន «ក្បត់ខ្លួនស្ងាត់ៗ» ដោយបន្ទោសក្រុមហ៊ុនផលិតគ្រឿងយុទ្ធោបករណ៍របស់ស៊ែប៊ីថា បានលក់គ្រាប់រំសេវ និងអាវុធទៅឲ្យអ៊ុយក្រែន។

តាមរយៈសេចក្តីថ្លែងការណ៍ដែលត្រូវបានបង្ហោះនៅលើគេហទំព័ររបស់ខ្លួន កាលពីថ្ងៃព្រហស្បតិ៍ (ទី២៩ ខែឧសភា) SVR បានឲ្យដឹងថា៖ «ការធ្វើបែបនោះ (ការលក់អាវុធ) មានគោលបំណងច្បាស់លាស់ ដើម្បីសម្លាប់ និងធ្វើឲ្យគ្រោះថ្នាក់ដល់បុគ្គលិកយោធា និងប្រជាជនស៊ីវិលរុស្ស៊ី»។

SVR បានបន្ថែមថា ស៊ែប៊ីបញ្ជូនអាវុធទៅកាន់អ៊ុយក្រែន តាមរយៈអន្តរការីរបស់អង្គការណាតូ (NATO) ដែលរួមសាធារណរដ្ឋឆេក ប៉ូឡូញ និងប៊ុលហ្គារី ក៏ដូចជាប្រទេសអាហ្វ្រិកមួយចំនួនផងដែរ។

លោក Vucic បានប្រាប់ទូរទស្សន៍រដ្ឋ RTS TV ថា លោកបានពិភាក្សា អំពីការនាំចេញអាវុធរបស់ស៊ែប៊ីទៅអ៊ុយក្រែនជាមួយមេដឹកនាំរុស្ស៊ីលោក Vladimir Putin នៅពេលលោកបានទៅទស្សនកិច្ចទីក្រុងមូស្គូកាលពីថ្ងៃទី៩ ខែឧសភា ហើយបានបដិសេធការចោទប្រកាន់មួយចំនួនរបស់ SVR៕