អ៊ីរ៉ង់ នៅថ្ងៃសុក្រ (ទី៣០ ខែឧសភា) នេះ បានឲ្យឈ្មោះថា ជា «ព័ត៌មានក្លែងក្លាយ» សម្រាប់របាយការណ៍ចារកម្មរបស់អូទ្រីស ដែលបានរៀបរាប់ថា ទីក្រុងតេអេរ៉ង់កំពុងប្រឹងប្រែងផលិតអាវុធបរមាណូ ទោះបីជាខ្លួនកំពុងបន្តការចរចារជាមួយសហរដ្ឋអាមេរិក ពាក់ព័ន្ធនឹងកម្មវិធីនុយក្លេអ៊ែររបស់ខ្លួនក៏ដោយ។

កាលពីថ្ងៃចន្ទដើមសប្ដាហ៍នេះ នៅក្នុងរបាយការណ៍ប្រចាំឆ្នាំរបស់ខ្លួន ស្តីពីការគំរាមកំហែងជាសាកល សេវាស៊ើបការណ៍សម្ងាត់ ក្នុងស្រុក (DSN) របស់ប្រទេសអូទ្រីស បានឲ្យដឹងថា «កម្មវិធីអភិវឌ្ឍន៍អាវុធនុយក្លេអ៊ែររបស់អ៊ីរ៉ង់ មានវឌ្ឍនភាពយ៉ាងល្អប្រសើរ»។

គួរបញ្ជាក់ថា សហរដ្ឋអាមេរិក អ៊ីស្រាអែល និងប្រទេសលោកខាងលិចផ្សេងទៀត បានចោទប្រកាន់អ៊ីរ៉ង់ម្តងហើយម្តងទៀតថា កំពុងប្រឹងប្រែងផលិតអាវុធនុយក្លេអ៊ែរ។ អ៊ីរ៉ង់បានបដិសេធយ៉ាងដាច់អហង្ការ ចំពោះការអះអាងនេះ ដោយជំនួសមកវិញបានផ្ដល់ហេតុផលថា ខ្លួនកំពុងបន្តកម្មវិធីនុយក្លេអ៊ែរ សម្រាប់គោលបំណងស៊ីវិលតែម្យ៉ាងប៉ុណ្ណោះ។

យោងតាមទីភ្នាក់ងារថាមពលបរមាណូអន្តរជាតិ (IAEA) អ៊ីរ៉ង់ គឺជាប្រទេសតែមួយគត់ ក្នុងពិភពលោកដែលបង្កើនសារធាតុអ៊ុយរ៉ាញ៉ូមរហូតដល់ ៦០ភាគរយ។ អត្រានោះនៅតែស្ថិតក្រោមកម្រិត ៩០ភាគរយដែលត្រូវការ ដើម្បីផលិតអាវុធនុយក្លេអ៊ែរ ប៉ុន្តែលើសពីកម្រិត ៣,៦៧ភាគរយដែលត្រូវបានបានកំណត់ក្រោមកិច្ចព្រមព្រៀងឆ្នាំ២០១៥ ជាមួយមហាអំណាចពិភពលោក។

របាយការណ៍របស់អូទ្រីស បានលើកឡើងថា «រាល់កិច្ចប្រឹងប្រែង ដើម្បីទប់ស្កាត់ដំណើរការផលិតអាវុធរបស់អ៊ីរ៉ង់ តាមរយៈការដាក់ទណ្ឌកម្ម និងកិច្ចព្រមព្រៀងកន្លងមក បានបង្ហាញឲ្យឃើញថា គ្មានប្រសិទ្ធភាពអ្វីឡើយ»។ តែនៅថ្ងៃសុក្រនេះ ក្រសួងការបរទេសអ៊ីរ៉ង់បានថ្កោលទោសថា ជា «ព័ត៌មានក្លែងក្លាយ» ដែលបានផ្សព្វផ្សាយក្នុងរបាយការណ៍នេះ ហើយទាមទារឲ្យមានការពន្យល់ពីរដ្ឋាភិបាលអូទ្រីស៕