អ្នកនាំពាក្យរបស់វិមានក្រឹមឡាំង នៅថ្ងៃសុក្រ (៣០ ឧសភា) បានប្រាប់ថា ទីក្រុងមូស្គូរំពឹងថា រុស្ស៊ី និងអ៊ុយក្រែន នឹងពិភាក្សាគ្នា អំពីលក្ខខណ្ឌនានា សម្រាប់បទឈប់បាញ់ ក្នុងសង្គ្រាមនៅអ៊ុយក្រែន នាសប្តាហ៍ក្រោយ ក្នុងទីក្រុងអ៊ីស្តង់ប៊ុល ប្រទេសទួរគី ខណៈបានពោលសរសើរពីតួនាទីរបស់សហរដ្ឋអាមេរិកក្នុងការជួយសម្របសម្រួលកិច្ចចរចា។

រុស្ស៊ីបានស្នើឲ្យរៀបចំកិច្ចចរចាជុំទី២ ជាមួយអ៊ុយក្រែន នៅទីក្រុងអ៊ីស្តង់ប៊ុល នាថ្ងៃទី២ ខែមិថុនា។ តែបើតាមរដ្ឋមន្ត្រីការបរទេស លោក Andrii Sybiha បាននិយាយនៅថ្ងៃសុក្រនេះថា អ៊ុយក្រែនចង់ឃើញសំណើរបស់រុស្ស៊ី សម្រាប់កិច្ចព្រមព្រៀងសន្តិភាព មុនពេលខ្លួនបញ្ជូនគណៈប្រតិភូទៅប្រទេសទួរគី។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា គណៈប្រតិភូរុស្ស៊ី នឹងធ្វើដំណើរទៅកាន់ទីក្រុងអ៊ីស្តង់ប៊ុល ហើយនឹងត្រៀមខ្លួន សម្រាប់កិច្ចពិភាក្សាជាមួយអ៊ុយក្រែន នៅព្រឹកថ្ងៃចន្ទ។

លោក Peskov បានប្រាប់អ្នកសារព័ត៌មានថា៖ «នាពេលនេះ មនុស្សគ្រប់គ្នាកំពុងផ្តោតលើការចរចាដោយផ្ទាល់ រវាងប្រទេសរុស្ស៊ី និងអ៊ុយក្រែន។ បញ្ជីរៀបរាប់លក្ខខណ្ឌនានា សម្រាប់បទឈប់បាញ់ កំពុងត្រូវបានបង្កើតឡើង»។ តែយ៉ាងណាក្ដី លោកបានបញ្ជាក់ថា ព័ត៌មានលម្អិតនៃអនុស្សរណៈនេះ នឹងមិនត្រូវបានផ្សព្វផ្សាយជាសាធារណៈនោះទេ។

ទីភ្នាក់ងារសារព័ត៌មាន Reuters បានរាយការណ៍នៅដើមសប្តាហ៍នេះថា លក្ខខណ្ឌរបស់លោក Vladimir Putin ដើម្បីបញ្ចប់សង្រ្គាមនៅអ៊ុយក្រែន រួមបញ្ចូលការទាមទារឲ្យមេដឹកនាំលោកខាងលិចសន្យាជាលាយលក្ខណ៍អក្សរបញ្ឈប់ការពង្រីកកម្លាំងរបស់អង្គការណាតូ (UN) នៅភាគខាងកើត។

បេសកជនរបស់លោកប្រធានាធិបតីអាមេរិក Donald Trump ប្រចាំនៅអ៊ុយក្រែន គឺលោក Keith Kellogg បាននិយាយនៅមុននេះថា ក្ដីបារម្ភរបស់រុស្ស៊ី ជុំវិញការពង្រីកកម្លាំងទៅតំបន់ភាគខាងកើតពីសំណាក់អង្គការណាតូ គឺជារឿងត្រឹមត្រូវ ហើយសហរដ្ឋអាមេរិកមិនចង់ឃើញវត្តមានអ៊ុយក្រែននៅក្នុងសម្ព័ន្ធភាពយោធាដឹកនាំដោយសហរដ្ឋអាមេរិកនេះទេ៕