ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃសុក្រថា ប្រទេសចិនបានរំលោភលើកិច្ចព្រមព្រៀងជាមួយសហរដ្ឋអាមេរិកដើម្បីកាត់បន្ថយការដំឡើងពន្ធទៅវិញទៅមកនិងការរឹតត្បិតពាណិជ្ជកម្មសម្រាប់រ៉ែសំខាន់ៗ និងបានចេញការគំរាមកំហែងថ្មីៗ ដើម្បីឱ្យកាន់តែតានតឹង ជាមួយទីក្រុងប៉េកាំង។ លោក Trump បាននិយាយនៅក្នុងការប្រកាសនៅលើវេទិកាបណ្តាញសង្គម Truth របស់លោកថា ចិន ប្រហែលជាមិនភ្ញាក់ផ្អើលទេចំពោះបញ្ហាមួយចំនួន ដែលបានបំពានលើកិច្ចព្រមព្រៀងរបស់ខ្លួនជាមួយសហរដ្ឋអាមេរិក។ 

លោក Trump បាននិយាយថាលោកបានបង្កើត «កិច្ចព្រមព្រៀងដ៏ឆាប់រហ័ស» កាលពីពាក់កណ្តាលខែឧសភាជាមួយមន្រ្តីចិន សម្រាប់ប្រទេសទាំងពីរដើម្បីដកថយពីការដំឡើងពន្ធមានតួលេខរហូតដល់៣ខ្ទង់សម្រាប់រយៈពេល៩០ថ្ងៃ។ លោកនិយាយថា លោកធ្វើបែបនេះដើម្បីជួយសង្គ្រោះប្រទេសចិន ពីស្ថានភាព «ដ៏មហន្តរាយ» ការបិទរោងចក្រនិងភាពវឹកវរស៊ីវិលដែលបណ្តាលមកពីការដំឡើងពន្ធរបស់លោករហូតដល់១៤៥ភាគរយលើការនាំចូលរបស់ប្រទេសចិន។ លោក Trump ពុំបានបញ្ជាក់ពីរបៀបដែលប្រទេសចិន បានរំលោភលើកិច្ចព្រមព្រៀងដែលបានធ្វើនៅទីក្រុងហ្សឺណែវ ប្រទេសស្វីស ឬចំណាត់ការអ្វីដែលលោកនឹងធ្វើប្រឆាំងទីក្រុងប៉េកាំង នោះទេ។ នៅពេលត្រូវបានសួរនៅក្នុងការិយាល័យ Oval Office អំពីកិច្ចព្រមព្រៀងរបស់ចិន លោក Trump បាននិយាយថា «ខ្ញុំប្រាកដថាខ្ញុំនឹងនិយាយទៅកាន់លោកប្រធានាធិបតី Xi ហើយសង្ឃឹមថាយើងនឹងដោះស្រាយបញ្ហានេះបាន»។

ប៉ុន្តែមន្ត្រីអាមេរិកម្នាក់បាននិយាយថា វាទំនងជាប្រទេសចិនកំពុងមានចំណាត់ការយឺតៗលើការសន្យាក្នុងការចេញអាជ្ញាប័ណ្ណនាំចេញសម្រាប់រ៉ែកម្រ។ កិច្ចព្រមព្រៀងនេះ បានអំពាវនាវឱ្យចិនដកចេញវិធានការប្រឆាំងតបតពាណិជ្ជកម្មដែលរឹតត្បិតលើការនាំចេញលោហៈសំខាន់ៗរបស់ខ្លួនដែលត្រូវការសម្រាប់ផលិតគ្រឿងអេឡិចត្រូនិក និងផ្នែកការពារជាតិរបស់អាមេរិក។