អ៊ុយក្រែន បានទប់ទល់ទៅនឹងសម្ពាធរបស់សហរដ្ឋអាមេរិកនិងរុស្ស៊ីក្នុងការប្តេជ្ញាចិត្តចូលរួមកិច្ចចរចាសន្តិភាពជុំមួយផ្សេងទៀតនៅថ្ងៃចន្ទ ទី២ ខែមិថុនា ដោយនិយាយថា ខ្លួនត្រូវការជាដំបូងដើម្បីមើលឃើញសំណើរបស់រុស្ស៊ី ខណៈសមាជិកព្រឹទ្ធសភាអាមេរិកឈានមុខម្នាក់ បានព្រមានទីក្រុងមូស្គូថា ទីក្រុងនេះនឹងរង «ផលវិបាក» ដោយទណ្ឌកម្មថ្មីរបស់សហរដ្ឋអាមេរិក។ ប្រធានាធិបតីសហរដ្ឋអាមេរិក លោក Donald Trump បានជំរុញឱ្យទីក្រុងមូស្គូ និងទីក្រុងគីវ ធ្វើការរួមគ្នាលើកិច្ចព្រមព្រៀងមួយដើម្បីបញ្ចប់សង្គ្រាមរយៈពេល៣ឆ្នាំរបស់ខ្លួន ហើយរុស្ស៊ីបានស្នើឱ្យមានកិច្ចពិភាក្សាទល់មុខគ្នាជាលើកទីពីរជាមួយមន្ត្រីអ៊ុយក្រែននៅសប្តាហ៍ក្រោយ ក្នុងទីក្រុងអ៊ីស្តង់ប៊ុល។ ទីក្រុងក្រុង គីវ បាននិយាយថា ខ្លួនបានប្ដេជ្ញាក្នុងការស្វែងរកសន្តិភាព ប៉ុន្តែថា ខ្លួនកំពុងរង់ចាំអនុស្សរណៈពីភាគីរុស្ស៊ី ដែលកំណត់ក្នុងសំណើនោះ។ ប្រធានាធិបតីអ៊ុយក្រែន លោក Volodymyr Zelenskyy បានសរសេរនៅលើបណ្តាញ X កាលពីថ្ងៃសុក្រថា «ដើម្បីឱ្យកិច្ចប្រជុំមានអត្ថន័យ របៀបវារៈត្រូវតែច្បាស់លាស់ ហើយការចរចាត្រូវតែរៀបចំឱ្យបានសមស្រប»។ លោកនិយាយថា «គួឲ្យសោកស្តាយ រុស្ស៊ីកំពុងធ្វើអ្វីគ្រប់យ៉ាងដែលអាចធ្វើទៅបាន ដើម្បីធានាថាកិច្ចប្រជុំដ៏មានសក្តានុពលបន្ទាប់នេះ នឹងគ្មានលទ្ធផលអ្វីឡើយ» ដោយលើកឡើងពីកង្វះឯកសារពីរុស្ស៊ី។ គណៈប្រតិភូរបស់ប្រទេសទាំងពីរ ធ្លាប់បានជួបប្រជុំគ្នានៅទីក្រុងអ៊ីស្តង់ប៊ុល កាលពីថ្ងៃទី ១៦ ឧសភា ប៉ុន្តែកិច្ចប្រជុំបានផ្តល់លទ្ធផលតិចតួច មានតែកិច្ចព្រមព្រៀងសម្រាប់ការដោះដូរឈ្លើ់យសឹកប៉ុណ្ណោះ ត្រូវបានធ្វើឡើង។ លោក Zelenskyy បាននិយាយថាលោកនិងប្រធានាធិបតីទួរគី លោក Tayyip Erdogan កាលពីថ្ងៃសុក្រ បានសន្ទនាគ្នាតាមទូរស័ព្ទអំពីលក្ខខណ្ឌដែលអ៊ុយក្រែននឹងចូលរួមក្នុងកិច្ចប្រជុំនៅថ្ងៃចន្ទ ដែលស្នើឡើងដោយរុស្ស៊ី។

លោក Zelenskyy បានសរសេរនៅលើបណ្តាញ Telegram ថា «ត្រូវតែមានបទឈប់បាញ់ ដើម្បីឆ្ពោះទៅរកសន្តិភាពបន្ថែមទៀត ហើយការសម្លាប់មនុស្សត្រូវតែបញ្ឈប់»។