អង្គការសហប្រជាជាតិ បានព្រមានកាលពីថ្ងៃសុក្រថា ប្រជាជនហ្កាហ្សាទាំងមូលប្រឈមនឹងគ្រោះទុរ្ភិក្ស ខណៈរដ្ឋមន្ត្រីស្តាំនិយមជ្រុលរបស់អ៊ីស្រាអែលបានជំរុញឱ្យប្រើប្រាស់ «កម្លាំងពេញលេញ» ប្រឆាំងក្រុមហាម៉ាស។ ការចរចាដើម្បីបញ្ចប់សង្រ្គាមជិត២០ខែ រហូតមកដល់ពេលនេះ បានបរាជ័យក្នុងការទទួលបានការទម្លាយភាពទាល់ច្រក ដោយអ៊ីស្រាអែលបន្តប្រតិបត្តិការនៅតំបន់ហ្កាហ្សាក្នុងខែមីនា បន្ទាប់ពី បទឈប់បាញ់រយៈពេលខ្លី។

ថ្មីៗនេះ អ៊ីស្រាអែល បានបង្កើនការវាយលុករបស់ខ្លួនជាអ្វីដែលបាននិយាយថា ជាការជំរុញជាថ្មីដើម្បីកម្ទេចក្រុមហាម៉ាស ដោយបានធ្វើឲ្យមានការថ្កោលទោសជាសកលចំពោះស្ថានភាពមនុស្សធម៌ដ៏អាក្រក់នៅក្នុងតំបន់ហ្កាហ្សា។ វីដេអូមួយរបស់ទូរទស្សន៍ AFP បានបង្ហាញពីទិដ្ឋភាពដ៏ច្របូកច្របល់ នៅពេលពលរដ្ឋប៉ាឡេស្ទីនយ៉ាងច្រើនដែលអស់សង្ឃឹមសម្រាប់ស្បៀងអាហារ បានប្រញាប់ប្រញាល់សម្រុកទៅកាន់មជ្ឈមណ្ឌលចែកចាយជំនួយមួយចំនួន ដើម្បីទទួលបានការផ្គត់ផ្គង់។

លោក Jens Laerke អ្នកនាំពាក្យរបស់ទីភ្នាក់ងារមនុស្សធម៌ OCHA របស់អង្គការសហប្រជាជាតិ បាននិយាយកាលពីថ្ងៃសុក្រថា «តំបន់ហ្កាហ្សា គឺជាកន្លែងដែលមានភាពស្រេកឃ្លានបំផុតនៅលើផែនដីនេះ» ។«វាជាតំបន់តែមួយគត់ដែលត្រូវបានកំណត់faជាកន្លែងដែលប្រជាជនទាំងមូលប្រឈមនឹងគ្រោះទុរ្ភិក្ស។ ១០០%នៃប្រជាជនប្រឈមនឹងគ្រោះទុរ្ភិក្ស»។