នៅថ្ងៃទី១ ខែមិថុនា ស្អែកនេះ ពោលគឺចំថ្ងៃទិវាកុមារអន្តរជាតិ ខួបលើកទី៧៦ នៅ​រមណីយដ្ឋាន​វប្បធម៌​ប្រវត្តិសាស្ត្រវត្តភ្នំ នឹងមានប្រារព្វបើកយុទ្ធនាការ “១ម៉ឺនរៀល ១ម៉ឺននាក់” ២០២៥ របស់​មូល​និធិ​គន្ធបុប្ជាកម្ពុជា ដែលតាមរយៈការអនុវត្តយុទ្ធនាការ បណ្តាអាណាព្យាបាលកុមារតូច សូម​អំពាវ​នាវ​សប្បុរសជនជាតិ អន្តរជាតិទាំងអស់ រួមគ្នាអនុវត្តយុទ្ធនាការនេះ ឧបត្ថម្ភថវិកា ជួយមន្ទីរ​ពេទ្យ​គន្ធ​បុប្ជាកម្ពុជាទាំងអស់គ្នា។

បើតាមបណ្តាអាណាព្យាបាលមកពីតាមបណ្តាខេត្ត ដែលបានយក​កូន​តូច​ទៅ​ព្យាបា​ល​នៅ​មន្ទីរ​ពេទ្យគន្ធបុប្ជាកម្ពុជា រាជធានីភ្នំពេញ បានថ្លែងប្រាប់BTV នៅថ្ងៃទី៣១ ខែឧសភានេះថា ជាក់ស្តែង​នៅពេលបច្ចុប្បន្ន និងតទៅថ្ងៃខាងមុខ គឺគ្រប់បណ្តាអាណាព្យាបាលនៅគ្រប់ទិសទី ដែលមានកូនតូចជួបជំងឺផ្សេងៗ គឺគេតែងតែមានតម្រូវការចាំបាច់ នាំកូនតូច មកប្រើប្រាស់សេវាសុខាភិបាលនៅមន្ទីរគន្ធបុប្ជាកម្ពុជា ដោយសារគេមានការជឿជាក់ ពេលយកកូនមកព្យាបាលនៅមន្ទីរពេទ្យនេះ គឺជាសះស្បើយតែម្តង និងមានមិនការចំណាយថវិកាអ្វីទាំងអស់។

តាមរយៈ ទិវាកុមារអន្តរជាតិលើកទី៧៦ ឆ្នាំ២០២៥នេះដែរ បណ្តាអាណាព្យាបាលទាំងនោះ បានថ្លែងអំពាវនាវឲ្យបណ្តាសប្បុរសជនជាតិ អន្តរជាតិ ចូលរួមបរិច្ចាគថវិកាចូលមកមូលនីធិគន្ធបុបា្ជកម្ពុជា តាមរយៈយុទ្ធនាការ ១ម៉ឺនរៀល ១ម៉ឺននាក់ ដើម្បីឲ្យមន្ទីរពេទ្យគន្ធបុប្ជាកម្ពុជាបន្តបេសកកម្មការងារផ្តល់សេវាសុខាភិបាល មានគុណភាព សុវត្ថិភាព ភាពទុកចិត្ត ភាពជឿជាក់ ជួយដល់សង្គ្រោះ ព្យាបាលជំងឺកាចសាហាវនានាជូនដល់កុមារនានា ដែលជាកូនខ្មែរ ទំពាំងស្នងឬស្សីរបស់យើងទាំងអស់គ្នា។

តាមសេចក្តីជូនដំណឹងរបស់រដ្ឋបាលរាជធានីភ្នំពេញ បានឲ្យដឹងថា នៅថ្ងៃទី១ ខែមិថុនា ស្អែកនេះ ពោលគឺចំនឹងថ្ងៃពិភពលោកប្រារព្វទិវាកុមារអន្តរជាតិ លើកទី៧៦ មូលនិធិគន្ធបុប្ផាកម្ពុជា នឹងរៀបចំពិធីបើកយុទ្ធនាការ " ១ម៉ឺនរៀល ១ម៉ឺននាក់ ” ឆ្នាំ២០២៥ នៅបរិវេណរូបសំណាក់ លោកយាយពេញ ខាងត្បូងរមណីយដ្ឋានវប្បធម៌ប្រវត្តិសាស្ត្រវត្តភ្នំ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់ លោកជំទាវ បណ្ឌិត ពេជ ចន្ទមុន្នី ប៊ុន ម៉ាណែត ប្រធានកិត្តិយស នៃមូលនិធិគន្ធបុប្ផាកម្ពុជា៕ អត្ថបទ ស៊ុម សុខជា