ទីភ្នាក់ងារស្វែងរក និងជួយសង្គ្រោះ Basarnas បាននិយាយថា អាជ្ញាធរឥណ្ឌូនេស៊ី នឹងបន្តស្វែងរកនៅថ្ងៃអាទិត្យ (០១ មិថុនា) នេះ សម្រាប់មនុស្ស ៨នាក់ ដែលជាប់នៅក្នុងបំណាក់ថ្មភ្នំមួយកន្លែងនៅឯទីតាំងជីកយកថ្មនៅខេត្ត West Java ជាទីដែលចំនួនអ្នកស្លាប់បានកើនឡើងដល់ ១៧នាក់ និង ៦នាក់ទៀតរងរបួស។

ទីភ្នាក់ងារនេះបាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃសៅរ៍ថា ចំនួនអ្នកស្លាប់ ដូចដែលរាយការណ៍ដោយក្រុមគ្រួសារជនរងគ្រោះ គឺជាតួលេខបណ្តោះអាសន្នប៉ុណ្ណោះ។ ទីតាំងនៃការដួលរលំកាលពីថ្ងៃសុក្រ នៅទីក្រុង Cirebon គឺមានគ្រោះថ្នាក់ណាស់ ហើយ "មិនស្របតាមស្តង់ដារសុវត្ថិភាពសម្រាប់កម្មករឡើយ" នេះបើតាមអភិបាលខេត្ត West Java លោក Dedi Mulyadi បានបង្ហោះនៅលើបណ្ដាញសង្គម Instagram ។

ក្រសួងថាមពល និងធនធានរ៉ែ បាននិយាយក្នុងសេចក្តីថ្លែងការណ៍មួយថា ខ្លួននឹងស៊ើបអង្កេតមូលហេតុនៃការបាក់រលំនេះ និងវាយតម្លៃដើម្បីកំណត់សញ្ញាដែលអាចកើតមាន ជុំវិញបំណាក់ដីបន្ថែមទៀត។

ប្រធានទីភ្នាក់ងារភូគព្ភសាស្ត្ររបស់ក្រសួង លោក Muhammad Wafid បាននិយាយនៅក្នុងសេចក្តីថ្លែងការណ៍ថា តំបន់ Cirebon ងាយនឹងមានបំណាក់ដីណាស់ ជាពិសេសនៅពេលទឹកភ្លៀងលើសកម្រិតធម្មតា ខណៈទីតាំងនៃការបាក់រលំមានជម្រាលជ្រោះ។ លោក Wafid បន្ថែមថា វិធីសាស្ត្រជីកយកថ្មពីចង្កេះភ្នំខាងក្រោមឡើងទៅលើ ដែលប្រើនៅក្នុងតំបន់រុករករ៉ែបើកចំហ និងជម្រាលចោត ក៏អាចជាមូលហេតុក្នុងហេតុការណ៍នេះផងដែរ៕