មន្ត្រីសង្គ្រោះបន្ទាន់ម្នាក់បានប្រាប់សារព័ត៌មានរ៉យទ័រ កាលពីថ្ងៃសៅរ៍ (៣១ ឧសភា) ថា ទឹកជំនន់នៅក្នុងរដ្ឋ Niger របស់ប្រទេសនីហ្សេរីយ៉ា ក្នុងសប្តាហ៍នេះ បានសម្លាប់មនុស្សចំនួន ១៥១នាក់ និងបានបង្ខំមនុស្សរាប់ម៉ឺននាក់ឱ្យជម្លៀសចេញពីផ្ទះសម្បែងរបស់ពួកគេ។ 

លោក Ibrahim Audu Hussaini នាយកផ្នែកព័ត៌មាននៅទីភ្នាក់ងារគ្រប់គ្រងគ្រោះអាសន្នរដ្ឋ Niger បានផ្តល់ចំនួនអ្នកស្លាប់ថ្មីនេះ ដែលត្រូវបានរាយការណ៍ពីមុនថា មានត្រឹម ១១៧នាក់ កាលពីថ្ងៃសុក្រ។ លោកបន្ថែមថា ជាង ៥០០គ្រួសាររងផលប៉ះពាល់ ហើយមនុស្សជាង ៣.០០០នាក់ ត្រូវជម្លៀសចេញ។ 

ឧប្បត្តិហេតុទឹកជំនន់នៅកណ្តាលទីក្រុង Mokwa ក្នុងរដ្ឋ Niger នេះ បានកើតឡើងកាលពីយប់ថ្ងៃពុធ ហើយបន្តរហូតដល់ព្រឹកថ្ងៃព្រហស្បតិ៍។ ប៉ុន្មានថ្ងៃក្រោយមក ក្រុមជួយសង្គ្រោះនៅតែបន្តប្រតិបត្តិការតាមល្បប់ភក់ និងកម្ទេចកម្ទី ដើម្បីស្វែងរកសាកសព។

នីហ្សេរីយ៉ា ងាយនឹងលិចលង់ក្នុងរដូវវស្សាណាស់ ដែលបានចាប់ផ្តើមនៅក្នុងខែមេសា។ កាលឆ្នាំ២០២២ រលកទឹកជំនន់ដ៏អាក្រក់បំផុតរបស់ប្រទេសនេះក្នុងពេលជាងមួយទសវត្សរ៍ បានសម្លាប់មនុស្សជាង ៦០០នាក់ ជម្លៀសខ្លួនប្រហែល ១,៤លាននាក់ និងបានបំផ្លាញដីស្រែចម្ការចំនួន ៤៤០.០០០ហិកតា ទូទាំងប្រទេស៕