ក្រសួងមហាផ្ទៃបារាំង បាននិយាយនៅថ្ងៃអាទិត្យ (០១ មិថុនា) នេះថា មនុស្ស ២នាក់ បានស្លាប់ ប្រមាណជាង ១៩០នាក់ បានរងរបួស និងប្រហែល ៥០០នាក់ ត្រូវបានចាប់ខ្លួននៅទូទាំងប្រទេសបារាំង បន្ទាប់ពីក្រុមអ្នកគាំទ្រក្លឹបបាល់ទាល់ Paris Saint-Germain ហៅកាត់ថា PSG បានអបអរជ័យជម្នះរបស់ក្លឹបក្នុងការប្រកួតវគ្គផ្តាច់ព្រ័ត្រ Champions League នៅប្រទេសបារាំង។

ការអបអរដ៏ពុះកញ្រ្ចោល បានផ្ទុះឡើងនៅទូទាំងរដ្ឋធានីរបស់ប្រទេសបារាំង និងនៅក្រៅប្រទេស កាលពីយប់ថ្ងៃសៅរ៍ បន្ទាប់ពីក្រុម PSG បានបំបាក់គូប្រជែងអ៊ីតាលី Inter Milan និងឈ្នះពាន Champions League ជាលើកដំបូង ខណៈក្រោយមកក៏មានការប៉ះទង្គិចជាមួយនគរបាល។

ការវាយតម្លៃបណ្តោះអាសន្នរបស់ក្រសួងមហាផ្ទៃ គិតត្រឹមព្រឹកព្រលឹមថ្ងៃអាទិត្យ គឺមានមនុស្ស ៥៥៩នាក់ ត្រូវបានចាប់ខ្លួន — រួមមានមនុស្ស ៤៩១នាក់នៅទីក្រុងប៉ារីស — ដែលនាំឱ្យនគរបាលត្រូវនាំខ្លួនមនុស្ស ៣២០នាក់ទៅឃុំឃាំង ហើយក្នុងចំណោមនោះមាន ២៥៤នាក់ នៅទីក្រុងប៉ារីស។

នៅលើដងផ្លូវ Champs Elysees ចំណតរថយន្តក្រុងត្រូវបានវាយកម្ទេច ហើយមនុស្សម្នាបានគប់វត្ថុទៅលើនគរបាលកុប្បកម្ម ដែលបានបាញ់ឧស្ម័នបង្ហូរទឹកភ្នែក និងកាណុងបាញ់ទឹក ដើម្បីរុញច្រានហ្វូងមនុស្សដ៏ច្រើន ខណៈអ្នកគាំទ្ររាប់ពាន់នាក់បានចុះទៅលើមហាវិថីមួយនោះដើម្បីអបអរ។

ក្រសួងមហាផ្ទៃនៅថ្ងៃអាទិត្យ បានរាយការណ៍ថា មានអគ្គិភ័យរាប់រយករណី ក្នុងនោះមានរថយន្តជាង ២០០គ្រឿងបានឆាបឆេះ ហើយសមាជិកកងកម្លាំងសន្តិសុខ ២២នាក់ និងអ្នកពន្លត់អគ្គិភ័យ ៧នាក់បានរងគ្រោះ៕