មនុស្សម្នារាប់ពាន់នាក់ បានដើរដង្ហែតវ៉ាតាមដងផ្លូវក្នុងប្រទេសប៊ុលហ្គារី កាលពីថ្ងៃសៅរ៍ (៣១ ឧសភា) ដោយអំពាវនាវឱ្យរដ្ឋាភិបាលរក្សារូបិយបណ្ណរបស់ប្រទេស គឺប្រាក់លីវប៊ុលហ្គារី (Bulgarian lev) និងកុំឱ្យចូលរួមនៅក្នុងតំបន់ចាយប្រាក់អឺរ៉ូ។

នៅក្នុងរដ្ឋធានីសូហ្វីយ៉ា និងទីក្រុងផ្សេងៗទៀត បាតុកម្មប្រឆាំងនឹងការដាក់ឱ្យប្រើប្រាស់រូបិយបណ្ណអឺរ៉ូ បានចាប់ផ្តើមនៅម៉ោងប្រហែលថ្ងៃត្រង់ ហើយការតវ៉ាទាំងនោះត្រូវបានរៀបចំឡើងដោយគណបក្សជាតិនិយមរបស់ប្រទេស និងអង្គការក្រៅរដ្ឋាភិបាលមួយចំនួន។

ក្រុមបាតុករជឿថា ប្រសិនបើប៊ុលហ្គារី ចូលទៅក្នុងតំបន់ចាយប្រាក់អឺរ៉ូ តម្លៃទំនិញនឹងកើនឡើង ហើយអធិបតេយ្យភាពសេដ្ឋកិច្ចរបស់ប្រទេសនឹងត្រូវបានរឹតត្បិត ហើយចង់ឱ្យប្រជាមតិមួយត្រូវបានធ្វើឡើងលើបញ្ហានេះ។ ប្រធានាធិបតីប៊ុលហ្គារី Rumen Radev ថ្មីៗនេះបានដាក់សំណើទៅសភាដើម្បីធ្វើប្រជាមតិ ថាតើប្រទេសនេះទទួលយកប្រាក់អឺរ៉ូជារូបិយប័ណ្ណរបស់ខ្លួនបានឬទេ។

នៅឆ្នាំ២០២៤ ធនាគារកណ្តាលអ៊ឺរ៉ុបបាននិយាយថា ប្រទេសនេះមិនអាចចូលរួមជាមួយសហជីពរូបិយវត្ថុនៃតំបន់ចាយប្រាក់អឺរ៉ូបានទេ ដោយសារអតិផរណានៅក្នុងប្រទេសមានកម្រិតខ្ពស់ពេក។ យ៉ាងណាក៏ដោយ ប៊ុលហ្គារីបានកំណត់គោលដៅចូលរួមតំបន់ចាយប្រាក់អឺរ៉ូនេះនៅឆ្នាំ២០២៦៕