បាតុកររាប់ពាន់នាក់ បានដើរដង្ហែឆ្លងកាត់ទីក្រុងរ៉ូម កាលពីថ្ងៃសៅរ៍ (៣១ ឧសភា) ដើម្បីតវ៉ាប្រឆាំងនឹងច្បាប់សន្តិសុខថ្មី ដែលត្រូវបានអនុម័តដោយរដ្ឋាភិបាលស្តាំនិយមរបស់នាយករដ្ឋមន្ត្រី លោកស្រី Giorgia Meloni ដោយបានរិះគន់កំណែទម្រង់យុត្តិធម៌ព្រហ្មទណ្ឌរបស់ខ្លួនថាជាការគាបសង្កត់។

ក្រោមការយាមកាមរបស់នគរបាលយ៉ាងតឹងរ៉ឹង និងកម្ដៅដ៏ក្តៅគគុក ក្រុមបាតុករបានដើរកាត់កណ្តាលទីក្រុងរ៉ូម ឆ្លងកាត់ទីតាំងសំខាន់ៗ ដោយគ្រវីទង់សហជីព និងទង់ជាតិប៉ាឡេស្ទីន។ ច្បាប់ថ្មីនេះបង្កើនការកាត់ទោសចំពោះអំពើមួយចំនួន រួមទាំងការតវ៉ា និងពង្រឹងការការពារមន្ត្រីនគរបាល ដែលត្រូវបានចោទប្រកាន់ពីការប្រើហិង្សា។

មេធាវី Cesare Antetomaso សមាជិកនៃសមាគមមេធាវីជាតិ បានប្រាប់ទីភ្នាក់ងារសារព័ត៌មានថា "ប្រជាជនអ៊ីតាលី បានចាត់ទុកច្បាប់នេះថាជាការវាយប្រហារដ៏ធំបំផុតលើសេរីភាពក្នុងការប្រឆាំង" ទល់នឹងរដ្ឋាភិបាល "នៅក្នុងប្រវត្តិសាស្ត្រនៃសាធារណរដ្ឋអ៊ីតាលី"។

នគរបាលដែលប្រឈមមុខនឹងការចោទប្រកាន់ពីបទហិង្សាក្នុងពេលបំពេញកាតព្វកិច្ច នឹងមានសិទ្ធិទទួលបានជំនួយផ្នែកច្បាប់ចំនួន ១០.០០០អឺរ៉ូ ក្រោមច្បាប់សន្តិសុខថ្មី។ បទល្មើសដូចជាការចូលរួមក្នុង "កុបកម្មនៅពន្ធនាគារ" នឹងអនុវត្តការកាត់ទោសកាន់តែធ្ងន់ធ្ងរ រួមទាំងករណីជាច្រើនផ្សេងទៀត៕