ទីប្រឹក្សាមួយរូបរបស់ប្រធានាធិបតីអ៊ុយក្រែន បានសម្តែងការព្រួយបារម្ភថា ការអនុវត្តអនុស្សរណៈនៃកិច្ចព្រមព្រៀងសន្តិភាពដែលបានស្នើឡើងជាមួយរុស្ស៊ី អាចរងបញ្ហាប្រឈមយ៉ាងខ្លាំង ដោយសារតែលក្ខខណ្ឌមិនច្បាស់លាស់ និងកង្វះការលាតត្រដាងចំណុចលម្អិតពីភាគីរុស្ស៊ី។

គួរឱ្យដឹងថា រុស្ស៊ីបានប្រកាសកាលពីថ្ងៃសុក្រ (៣០ ឧសភា) ថា ខ្លួនត្រៀមខ្លួនជាស្រេចដើម្បីចាប់ផ្តើមកិច្ចចរចាជុំទីពីរជាមួយអ៊ុយក្រែននៅថ្ងៃទី០២ ខែមិថុនា ស្អែកនេះ ប៉ុន្តែមន្ត្រីអ៊ុយក្រែន នៅតែមានការសង្ស័យអំពីលទ្ធភាពនៃអនុស្សរណៈឈប់បាញ់ណាមួយដែលបានស្នើឡើងដោយសារតែខ្វះតម្លាភាព។

កាលពីថ្ងៃសៅរ៍ លោក Serhiy Leshchenko ទីប្រឹក្សាប្រធានការិយាល័យប្រធានាធិបតីអ៊ុយក្រែន បាននិយាយថា រុស្ស៊ីមិនបានបង្ហាញពីអត្ថបទពេញលេញនៃសំណើអនុស្សរណៈឈប់បាញ់ទេ ដែលធ្វើឱ្យមានការលំបាកយ៉ាងខ្លាំងសម្រាប់ភាគីទាំងអស់ ក្នុងការវាយតម្លៃលទ្ធភាពជោគជ័យរបស់ខ្លួន។

កាលពីថ្ងៃសៅរ៍ដដែលនេះ ប្រធានាធិបតីអ៊ុយក្រែន លោក Volodymyr Zelensky បាននិយាយថា អ៊ុយក្រែន និងដៃគូរបស់ខ្លួន រួមទាំងប្រទេសទួរគី និងសហរដ្ឋអាមេរិក មិនបានទទួលរបៀបវារៈលម្អិតណាមួយសម្រាប់ការចរចានាពេលខាងមុខជាមួយរុស្ស៊ីទេ។

ទន្ទឹមនឹងនោះ រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយថា លក្ខខណ្ឌមួយក្នុងចំណោមលក្ខខណ្ឌរបស់រុស្ស៊ី សម្រាប់ការដោះស្រាយវិបត្តិអ៊ុយក្រែន គឺថា អ៊ុយក្រែនត្រូវតែត្រលប់ទៅស្ថានភាពអព្យាក្រឹត មិនចូលបក្សសម្ព័ន្ធ និងមិនមានអាវុធនុយក្លេអ៊ែរ៕