លោក Scott Bessent រដ្ឋមន្ត្រីក្រសួងរតនាគារ បាននិយាយកាលពីថ្ងៃអាទិត្យថា ប្រធានាធិបតីសហរដ្ឋអាមេរិក លោក Donald Trump និងប្រធានាធិបតីចិន លោក Xi Jinping នឹងជួបសន្ទនាគ្នាក្នុងពេលឆាប់ៗនេះ ដើម្បីដោះស្រាយបញ្ហាពាណិជ្ជកម្ម រួមទាំងជម្លោះជុំវិញរ៉ែសំខាន់ៗ។

លោក Trump កាលពីថ្ងៃសុក្រសប្តាហ៍មុននេះ បានចោទប្រកាន់ប្រទេសចិនថា បានរំលោភលើកិច្ចព្រមព្រៀងជាមួយសហរដ្ឋអាមេរិកក្នុងការកាត់បន្ថយការដំឡើងពន្ធទៅវិញទៅមក និងការរឹតត្បឹតពាណិជ្ជកម្មសម្រាប់រ៉ែសំខាន់ៗ។

លោក Bessent បាននិយាយនៅក្នុងបទសម្ភាសន៍ជាមួយប្រព័ន្ធផ្សព្វផ្សាយ CBS ថា «អ្វីដែលប្រទេសចិន កំពុងធ្វើគឺប្រទេសកំពុងរារាំងផលិតផលដែលចាំបាច់សម្រាប់ខ្សែច្រវ៉ាក់ផ្គត់ផ្គង់ឧស្សាហកម្មរបស់ប្រទេសឥណ្ឌា និងរបស់អឺរ៉ុប ហើយនេះពុំមែនជាអ្វីដែលដៃគូអាចទុកចិត្តបាន ត្រូវធ្វើនោះទេ»។

«ខ្ញុំមានទំនុកចិត្តថា នៅពេលដែលលោកប្រធានាធិបតី Trump និងប្រធានាធិបតីចិន លោក Xi មានការជួបសន្ទនាគ្នាតាមទូរស័ព្ទ នោះអ្វីៗនឹងត្រូវបានដោះស្រាយ។

ទីប្រឹក្សាសេដ្ឋកិច្ចសេតវិមាន លោក Kevin Hassett បាននិយាយថា ពុំទាន់មានកាលបរិច្ឆេទជាក់លាក់សម្រាប់ការសន្ទនាត្រូវបានកំណត់នៅឡើយ ប៉ុន្តែមានការសន្ទនាដែលមេដឹកនាំនឹងពិភាក្សាអំពីកិច្ចព្រមព្រៀងទីក្រុងហ្សឺណែវកាលពីខែមុន ស្តីពីជម្លោះការដំឡើងពន្ធមួយចំនួន។

លោក Hassett និយាយថា ការរំពឹងទុករបស់យើង លោកប្រធានាធិបតី Trump នឹងមានការជួបសន្ទនាអំពីការចរចាពាណិជ្ជកម្មនៅសប្តាហ៍នេះជាមួយលោកប្រធានាធិបតី Xi ។