ក្រុមអ្នកចរចាអ៊ុយក្រែន នៅក្នុងកិច្ចពិភាក្សាដែលគ្រោងធ្វើឡើងនៅថ្ងៃទី០២ ខែមិថុនា នេះ នៅទីក្រុងអ៊ីស្តង់ប៊ុល របស់ទួរគី នឹងបង្ហាញដល់ភាគីរុស្ស៊ី នូវផែនទីបង្ហាញផ្លូវដែលបានស្នើឡើងសម្រាប់ការឈានដល់ដំណោះស្រាយសន្តិភាពយូរអង្វែង នេះបើយោងតាមច្បាប់ចម្លងនៃឯកសារដែលមើលឃើញដោយសារព័ត៌មានរ៉យទ័រ។

សំណើផែនទីបង្ហាញផ្លូវនោះ ចាប់ផ្តើមជាមួយនឹងបទឈប់បាញ់ពេញលេញយ៉ាងហោច ៣០ថ្ងៃ រួចបន្តដោយការវិលត្រឡប់របស់ឈ្លើយសឹកទាំងអស់ដែលត្រូវឃុំខ្លួនដោយភាគីនីមួយៗ ហើយនិងកុមារអ៊ុយក្រែនដែលត្រូវចាប់ចូលទៅក្នុងទឹកដីកាន់កាប់ដោយរុស្ស៊ី បន្ទាប់មកជំនួបរវាងលោកប្រធានាធិបតីអ៊ុយក្រែន Volodymyr Zelenskiy និងមេដឹកនាំរុស្ស៊ី លោក Vladimir Putin។

នៅក្រោមផែនការមេនោះ ទីក្រុងមូស្គូ និងទីក្រុងគីវ — ដោយមានការចូលរួមពីសហរដ្ឋអាមេរិក និងអឺរ៉ុប — នឹងធ្វើការដើម្បីដាក់ចេញលក្ខខណ្ឌដែលពួកគេអាចយល់ព្រមបានក្នុងការបញ្ចប់សង្រ្គាមអាយុកាល ៣ឆ្នាំនេះទាំងស្រុង។ ក្រុមមន្ត្រីអ៊ុយក្រែន បាននិយាយនៅដើមសប្តាហ៍មុនថា ពួកគេបានបញ្ជូនផែនការមេទៅភាគីរុស្ស៊ី នៅមុនកិច្ចពិភាក្សាទីក្រុងអ៊ីស្តង់ប៊ុល នាថ្ងៃចន្ទនេះ។

ក្របខណ្ឌលក្ខខណ្ឌរបស់អ៊ុយក្រែន សម្រាប់កិច្ចព្រមព្រៀងសន្តិភាពដូចមានចែងក្នុងឯកសារមើលឃើញដោយរ៉យទ័រនេះ គឺភាគច្រើនដូចគ្នាទៅនឹងលក្ខខណ្ឌដែលដាក់ចេញពីមុនដោយទីក្រុងគីវ។ ទាំងនោះរួមមានការរឹតត្បិតលើកម្លាំងយោធាអ៊ុយក្រែន បន្ទាប់ពីកិច្ចព្រមព្រៀងសន្តិភាពត្រូវធ្វើឡើង ពុំមានការទទួលស្គាល់ជាអន្តរជាតិពីអធិបតេយ្យភាពរុស្ស៊ីលើផ្នែកខ្លះនៃអ៊ុយក្រែនដែលកាន់កាប់ដោយកងកម្លាំងក្រុងមូស្គូ និងសំណងសម្រាប់អ៊ុយក្រែន។

ឯកសារក៏បញ្ជាក់ដែរថា ទីតាំងបច្ចុប្បន្ននៃជួរមុខនឹងជាចំណុចចាប់ផ្តើមសម្រាប់ការចរចាអំពីទឹកដី។ ចំណុចលក្ខខណ្ឌទាំងនោះមានភាពខុសគ្នាខ្លាំងពីការទាមទារដែលរុស្ស៊ីបានប្រកាសជាសាធារណៈក្នុងប៉ុន្មានសប្តាហ៍កន្លងទៅ៕