នៅមុនថ្ងៃនៃកិច្ចចរចាសន្តិភាព អ៊ុយក្រែន និងរុស្ស៊ី បានបង្កើនភ្លើងសង្គ្រាមយ៉ាងខក្ដៅគគុកជាមួយនឹងសមរភូមិយានដ្រូនដ៏ធំបំផុតនៃជម្លោះរវាងប្រទេសទាំងពីរ ស្ពានផ្លូវហាយវេរបស់រុស្ស៊ីមួយខ្សែត្រូវ បានបំផ្ទុះបាក់សង្កត់លើរថភ្លើងដឹកអ្នកដំណើរមួយ និងការវាយប្រហារប្រកបដោយមហិច្ឆតាលើយន្តហោះទម្លាក់គ្រាប់បែក ដែលមានសមត្ថភាពបំពាក់នុយក្លេអ៊ែរ ចូលជ្រៅក្នុងទឹកដីស៊ីបេរី។

បន្ទាប់ពីភាពមិនច្បាស់លាស់ជាច្រើនថ្ងៃអំពីថាតើអ៊ុយក្រែននឹងចូលរួមឬក៏អត់នោះ ប្រធានាធិបតី Volodymyr Zelenskyy បាននិយាយថា រដ្ឋមន្ត្រីការពារជាតិលោក Rustem Umerov នឹងអង្គុយជាមួយក្រុមមន្ត្រីរុស្ស៊ីក្នុងជុំទីពីរនៃកិច្ចចរចាសន្តិភាពដោយផ្ទាល់នៅទីក្រុងអ៊ីស្តង់ប៊ុលនៅថ្ងៃចន្ទសប្ដាហ៍នេះ។ជុំទីមួយនៃកិច្ចចរចាកាលពីជាងមួយសប្តាហ៍មុន បានផ្តល់នូវការដោះដូរឈ្លើយសឹកដ៏ធំបំផុតនៃសង្រ្គាម ប៉ុន្តែគ្មានការយល់ស្របណាមួយអំពីវិធីបញ្ឈប់ការប្រយុទ្ធនោះទេ។

មនុស្សយ៉ាងហោចណាស់៧នាក់បានស្លាប់ និង ៦៩ នាក់បានរងរបួស នៅពេលស្ពានផ្លូវហាយវេក្នុងតំបន់ Bryansk របស់ប្រទេសរុស្ស៊ីជិតព្រំដែនអ៊ុយក្រែនត្រូវបានបំផ្ទុះបាក់ធ្លាក់លើរថភ្លើងដឹកអ្នកដំណើរឆ្ពោះទៅទីក្រុងមូស្គូ ដែលមានមនុស្សចំនួន ៣៨៨នាក់នៅលើរថភ្លើងនោះ។ ពុំទាន់មាននរណាម្នាក់អះអាងទទួលខុសត្រូវនៅឡើយទេ។

អ៊ុយក្រែនបានវាយប្រហារយន្តហោះទម្លាក់គ្រាប់បែករយៈចម្ងាយឆ្ងាយដែលមានសមត្ថភាពផ្ទុកនុយក្លេអ៊ែររបស់រុស្ស៊ីនៅឯមូលដ្ឋានយោធាជ្រៅក្នុងដែនដីស៊ីបេរីកាលពីថ្ងៃអាទិត្យ ដែលជាការវាយប្រហារលើកដំបូងរហូតមកដល់ពេលនេះពីសមរភូមិជួរមុខ ដែលមានចម្ងាយជាង ៤.៣០០គីឡូម៉ែត្រ។

កងកម្លាំងអាកាសអ៊ុយក្រែននិយាយថារុស្ស៊ីបានបាញ់បង្ហោះយានដ្រូន៤៧២គ្រឿង ជាចំនួនខ្ពស់បំផុតក្នុងការវាយប្រហារទាំងយប់រហូតមកដល់ពេលនេះ ។រុស្ស៊ី ក៏បានបាញ់មីស៊ីល៧គ្រាប់ផងដែរ៕