នៅពេលសង្រ្គាមដ៏បំផ្លិចបំផ្លាញរបស់អ៊ីស្រាអែល លើតំបន់ហ្កាហ្សា កំពុងបន្តយ៉ាងតានតឹង ដែលជំរុញដោយការទទូចសម្រេចឱ្យបាននូវគោលដៅជ័យជម្នះយោធាទាំងស្រុងរបស់លោកនាយករដ្ឋមន្ត្រី Benjamin Netanyahu ការខ្វែងគំនិតគ្នា និងចលាចលផ្ទៃក្នុងនៅក្នុងសង្គមអ៊ីស្រាអែល បន្តកើតមានកាន់តែស៊ីជម្រៅឡើង។

ក្នុងប៉ុន្មានសប្តាហ៍ចុងក្រោយនេះ នៅពេលសកម្មជនសន្តិភាព និងក្រុមប្រឆាំងសង្រ្គាមរបស់អ៊ីស្រាអែល បានបង្កើនយុទ្ធនាការរបស់ពួកគេប្រឆាំងនឹងជម្លោះ ក្រុមអ្នកគាំទ្រនៃសង្រ្គាមក៏បានបង្កើនសម្ពាធរបស់ពួកគេតបតវិញក្នុងការទាមទារោ្យបន្តប្រយុទ្ធ ទោះបីជាត្រូវបង់ខាតដោយតម្លៃមនុស្សធម៌ នយោបាយ ឬការទូតយ៉ាងណាក៏ដោយ។

សមាជិកយោធា បានចេញលិខិតចំហតវ៉ាប្រឆាំងការលើកទឹកចិត្តខាងនយោបាយឱ្យបន្តសង្គ្រាមហ្កាហ្សា ឬអះអាងថាការវាយលុកចុងក្រោយលើតំបន់ប៉ាឡេស្ទីននេះ បានបង្កហានិភ័យដល់ចំណាប់ថ្នូរអ៊ីស្រាអែលដែលនៅសេសសល់។ លិខិតចំហមួយទៀតមកពីស្ថាប័នអប់រំនានារបស់អ៊ីស្រាអែល បានធ្វើរឿងដ៏កម្រមួយក្នុងប្រទេសនេះ ចាប់តាំងពីសង្រ្គាមចាប់ផ្តើមក្នុងខែតុលា ឆ្នាំ២០២៣មក គឺផ្តោតលើទុក្ខវេទនារបស់ជនជាតិប៉ាឡេស្ទីន។

ផ្ទុយពីការរិះគន់សង្រ្គាមទាំងនេះ ការស្ទង់មតិថ្មីៗបានរាយការណ៍ថា តួលេខ ៨២% នៃអ្នកឆ្លើយតបជនជាតិជ្វីហ្វអ៊ីស្រាអែល នៅតែចង់មើលឃើញប្រជាជនប៉ាឡេស្ទីននៅតំបន់ហ្កាហ្សា ត្រូវបានបោសសម្អាត ដោយស្ទើរតែតួលេខ ៥០% ក៏គាំទ្រនូវអ្វីដែលពួកគេនិយាយថាជា "ការកាប់សម្លាប់ទ្រង់ទ្រាយធំ" នៃជនស៊ីវិល នៅក្នុងទីក្រុងសត្រូវដែលកាន់កាប់ដោយកងទ័ពអ៊ីស្រាអែល៕