រដ្ឋមន្ត្រីការបរទេសអារ៉ាប៊ីសាអ៊ូឌីត គឺព្រះអង្គម្ចាស់ Faisal bin Farhan Al-Saud បានមានបន្ទូលថា ការបដិសេធរបស់រដ្ឋាភិបាលអ៊ីស្រាអែល ក្នុងការអនុញ្ញាតឱ្យគណៈប្រតិភូរដ្ឋមន្ត្រីអារ៉ាប់ ចូលទៅទស្សនកិច្ចនៅតំបន់កាន់កាប់ West Bank បានបង្ហាញពី "ភាពជ្រុលនិយម និងការបដិសេធសន្តិភាព"។

សេចក្តីថ្លែងការណ៍របស់ទ្រង់ បានធ្វើឡើងក្នុងអំឡុងសន្និសីទសារព័ត៌មានរួមនៅទីក្រុងអាម៉ាន់ ជាមួយសមភាគីមកពីប្រទេសហ្ស៊កដានី អេហ្ស៊ីប និងបារ៉ែន បន្ទាប់ពីមេដឹកនាំទាំងនោះបានជួបប្រជុំគ្នាជាផ្នែកមួយនៃក្រុមទំនាក់ទំនងអារ៉ាប់ ដែលនឹងទៅជួបប្រធានអាជ្ញាធរប៉ាឡេស្ទីន លោក Mahmoud Abbas នៅក្រុង Ramallah។

រដ្ឋមន្ត្រីអារ៉ាប៊ីសាអ៊ូឌីតអង្គនេះបានរិះគន់ថា "ការបដិសេធរបស់អ៊ីស្រាអែល ចំពោះដំណើរទស្សនកិច្ចរបស់គណៈកម្មាធិការទៅតំបន់ West Bank បានបញ្ជាក់ពីភាពជ្រុលនិយមរបស់ខ្លួន និងការបដិសេធចំពោះការប៉ុនប៉ងម៉ឺងម៉ាត់ណាមួយសម្រាប់មាគ៌ាសន្តិភាព ហើយនោះកាន់តែពង្រឹងឆន្ទៈរបស់អារ៉ាប់ក្នុងការខិតខំការទូតឱ្យបានទ្វេដង នៅក្នុងសហគមន៍អន្តរជាតិ ដើម្បីតទាំងនឹងភាពក្រអឺតក្រទមនេះ"។

ក្រុមមន្ត្រីអាជ្ញាធរប៉ាឡេស្ទីននិយាយថា កាលពីថ្ងៃសៅរ៍ អ៊ីស្រាអែលបានប្រាប់ថា ខ្លួននឹងមិនអនុញ្ញាតឱ្យមានកិច្ចប្រជុំដែលបានគ្រោងទុកនៅថ្ងៃអាទិត្យ ដែលនឹងរួមបញ្ចូលរដ្ឋមន្ត្រីមកពីប្រទេសហ្ស៊កដានី អេហ្ស៊ីប អារ៉ាប៊ីសាអូឌីត កាតា និងអារ៉ាប់រួម នោះទេ។ មន្ត្រីអ៊ីស្រាអែលម្នាក់និយាយថា រដ្ឋមន្ត្រីអារ៉ាប់ទាំងនោះមានបំណងចូលរួមក្នុង "កិច្ចប្រជុំបង្កហេតុ" ដើម្បីពិភាក្សាលើកកម្ពស់ការបង្កើតរដ្ឋប៉ាឡេស្ទីន៕