ក្រុមហាម៉ាស បានប្រកាសកាលពីថ្ងៃអាទិត្យ (០១ មិថុនា) ថា ខ្លួនបានត្រៀមរួចជាស្រេចដើម្បីចាប់ផ្តើមភ្លាមៗនូវការចរចាដោយប្រយោលថ្មីមួយលើ "ចំណុចជម្លោះ" ដែលនៅសេសសល់ ស្របពេលមានសម្ពាធពីអ្នកសម្រុះសម្រួលឱ្យក្រុមនេះបន្ទន់ជំហរ បន្ទាប់ពីហាម៉ាស បានដាក់ការឆ្លើយតបទៅនឹងសំណើបទឈប់បាញ់របស់សហរដ្ឋអាមេរិក និងកិច្ចព្រមព្រៀងចំណាប់ថ្នូរ ដែលទីក្រុងវ៉ាស៊ីនតោនបានហៅថា "មិនអាចទទួលយកបានទាល់តែសោះ"។

ក្រុមសកម្មប្រយុទ្ធហាម៉ាស បាននិយាយក្នុងសេចក្ដីថ្លែងការណ៍មួយថា គោលដៅខ្លួនសម្រាប់កិច្ចពិភាក្សាថ្មី គឺដើម្បីសម្រេចកិច្ចព្រមព្រៀងដែល "ធានាការសង្គ្រោះប្រជាជនប៉ាឡេស្ទីន និងបញ្ចប់មហន្តរាយមនុស្សធម៌ ដែលទីបំផុតនាំទៅដល់បទឈប់បាញ់អចិន្ត្រៃយ៍ និងការដកទ័ពទាំងស្រុង"។

ក្រុមប៉ាឡេស្ទីននេះមិនបាននិយាយថាខ្លួនដកចេញ ឬកែប្រែសំណើដែលបានដាក់កាលពីថ្ងៃសៅរ៍ចុងសប្ដាហ៍ ទៅប្រេសិតពិសេសអាមេរិក លោក Steve Witkoff នោះទេ។ លោក Witkoff បាននិយាយកាលពីថ្ងៃសៅរ៍ថា ការឆ្លើយតបរបស់ពួកហាម៉ាស "នាំទៅជំហានថយក្រោយ" ហើយលោកចង់ឱ្យក្រុមនេះ ទទួលយក "សំណើរក្របខ័ណ្ឌ" ជាមូលដ្ឋានសម្រាប់ជុំនៃ "កិច្ចពិភាក្សាជិតស្និទ្ធ" ដែលនឹងធ្វើឡើងនៅប៉ុន្មានថ្ងៃខាងមុខ។

ក្រុមហាម៉ាស នៅក្នុងសេចក្តីថ្លែងការណ៍កាលពីថ្ងៃអាទិត្យរបស់ខ្លួន ហាក់បញ្ជាក់ពីឆន្ទៈក្នុងការរៀបចំកិច្ចពិភាក្សាទាំងនោះ។ ការិយាល័យនាយករដ្ឋមន្ត្រី Benjamin Netanyahu បាននិយាយកាលពីថ្ងៃអាទិត្យថា អ៊ីស្រាអែលបានទទួលយកសំណើរបស់លោក Witkoff ហើយ ប៉ុន្តែគណៈរដ្ឋមន្ត្រីរបស់លោកមិនទាន់បោះឆ្នោតសម្រេចនៅឡើយទេ ហើយរដ្ឋមន្ត្រីស្តាំនិយមមួយចំនួនបានសម្តែងការប្រឆាំងលើសំណើសន្តិភាពនោះ៕