ក្រុមមន្ត្រីបាននិយាយកាលពីថ្ងៃអាទិត្យ (០១ មិថុនា) ថា ចំនួនអ្នកស្លាប់បន្ទាប់ពីទឹកជំនន់ដ៏អាក្រក់បានវាយប្រហារទីក្រុង Mokwa របស់ប្រទេសនីហ្សេរីយ៉ា កាលពីថ្ងៃព្រហស្បតិ៍សប្ដាហ៍មុន បានកើនឡើងដល់ជាង ២០០នាក់ហើយ ដោយបន្ថែមថា នៅតែមានមនុស្ស ៥០០នាក់ កំពុងបាត់ខ្លួនក្នុងទីប្រជុំជនខាងជើងនៃភាគកណ្តាលរដ្ឋ Niger ខណៈបេសកកម្មស្វែងរកនៅតែបន្ត។

អនុប្រធានរដ្ឋាភិបាលក្នុងតំបន់ Mokwa លោក Musa Kimboku បានប្រាប់សារព័ត៌មាន BBC ថា កិច្ចខិតខំប្រឹងប្រែងជួយសង្គ្រោះបានផ្អាក ដោយសារអាជ្ញាធរជឿថា ពុំមាននរណាម្នាក់អាចនៅមានជីវិតទៀតទេ។ ទឹកជំនន់ដែលប្រហែលជាអាក្រក់បំផុតនៅក្នុងតំបន់នេះអស់ពេល ៦០ឆ្នាំ បានហូរកាត់ទីប្រជុំជន Tiffin Maza និង Hausawa បន្ទាប់ពីភ្លៀងធ្លាក់យ៉ាងខ្លាំងឥតឈប់ឈរជាច្រើនថ្ងៃ។

ដោយរៀបរាប់ពីទិដ្ឋភាពនៃមហន្តរាយ អ្នកស្រុកក្នុងតំបន់បានប្រាប់ BBC ថា ពួកគេបានមើលឃើញផ្ទះសម្បែងរបស់ពួកគេ និងសមាជិកគ្រួសារត្រូវទឹកហូរជន់លិចយ៉ាងសោកសៅ។ កាលពីថ្ងៃអាទិត្យ ទីភ្នាក់ងារគ្រប់គ្រងគ្រោះអាសន្នជាតិ (Nema) ប្រកាសថា ខ្លួនបានចាប់ផ្តើមដំណើរការផ្តល់កញ្ចប់ជំនួយសម្រាលបន្ទុកដល់ប្រជាពលរដ្ឋរងផលប៉ះពាល់។

នីហ្សេរីយ៉ា ងាយនឹងលិចលង់ក្នុងរដូវវស្សាណាស់ ដែលបានចាប់ផ្តើមនៅក្នុងខែមេសា។ កាលឆ្នាំ២០២២ រលកទឹកជំនន់ដ៏អាក្រក់បំផុតរបស់ប្រទេសនេះក្នុងពេលជាងមួយទសវត្សរ៍ បានសម្លាប់មនុស្សជាង ៦០០នាក់ ជម្លៀសខ្លួនប្រហែល ១,៤លាននាក់ និងបានបំផ្លាញដីស្រែចម្ការចំនួន ៤៤០.០០០ហិកតាទូទាំងប្រទេស៕