អ្នកបោះឆ្នោតនៅប្រទេសកូរ៉េខាងត្បូង នឹងធ្វើដំណើរទៅបោះឆ្នោតនៅថ្ងៃអង្គារស្អែកនេះ ដើម្បីជ្រើសរើសប្រធានាធិបតីថ្មី។ បេក្ខជនមកពីគណបក្សកាន់អំណាច និងគណបក្សប្រឆាំង បានព្យាយាមដណ្តើមអ្នកបោះឆ្នោតចុងក្រោយរបស់ខ្លួននៅថ្ងៃចន្ទនេះ ជាថ្ងៃចុងក្រោយនៃការធ្វើយុទ្ធនាការ។

បេក្ខជននាំមុខពីររូប គឺលោក Lee Jae-myung របស់គណបក្សប្រជាធិបតេយ្យជាគណបក្សប្រឆាំងធំ និងលោក Kim Moon-soo មកពីគណបក្សកាន់អំណាចអភិរក្សនិយម។ ការបោះឆ្នោតស្ទង់មតិ បានលើកឡើងថា លោក Lee គឺជាអ្នកនាំមុខគេ ដោយលោក Kim តាមពីក្រោយ។

ប៉ុន្តែលទ្ធផលនៃការស្ទង់មតិរបស់ក្រុម Gallup Korea ដែលបានចេញផ្សាយកាលពីថ្ងៃទី២៣ ខែឧសភា បង្ហាញថា គម្លាតរវាងបេក្ខជនទាំងពីរមានភាពចង្អៀត។ អ្នកគាំទ្រលោក Kim បាននឹងកំពុងអំពាវនាវឱ្យលោក Lee Jun-seok នៃគណបក្សកំណែទម្រង់អភិរក្ស បោះបង់បេក្ខភាពរបស់លោក ដើម្បីរួមគ្នាជាមួយក្រុមអភិរក្សនិយមនៅពីក្រោយលោក Kim Moon-soo ។

ប៉ុន្តែការប៉ុនប៉ងនេះ បានបរាជ័យ ខណៈរយៈពេលនៃយុទ្ធនាការរយៈពេល២២ថ្ងៃ ត្រូវបានបញ្ចប់។ ការរាប់សន្លឹកឆ្នោត នៃការបោះឆ្នោតស្អែកនេះ ត្រូវបានគេគ្រោងនឹងចាប់ផ្តើមនៅពេលដែលហិបឆ្នោត ត្រូវបានបិទ នៅថ្ងៃអង្គារ។