ប្រមុខអង្គការថាមពលអាតូមិករបស់អ៊ីរ៉ង់លោក Mohammad Eslami បាននិយាយកាលពីថ្ងៃអាទិត្យថាការចម្រាញ់សារធាតុអ៊ុយរ៉ានីញ៉ូម គឺជាគ្រឹះនៃឧស្សាហកម្មនុយក្លេអ៊ែរ និងជាបន្ទាប់ក្រហមសម្រាប់ទីក្រុងតេអេរ៉ង់។  

លោកបានអត្ថាធិប្បាយបែបនេះក្នុងបទសម្ភាសន៍ជាមួយទូរទស្សន៍រដ្ឋ IRIB ខណៈមានប្រតិកម្មទៅនឹងការអំពាវនាវរបស់សហរដ្ឋអាមេរិកឱ្យអ៊ីរ៉ង់បញ្ឈប់ការចម្រាញ់សារធាតុអ៊ុយរ៉ានីញ៉ូមរបស់ខ្លួន និងរបាយការណ៍ទូលំទូលាយដែលចងក្រងដោយទីភ្នាក់ងារថាមពលអាតូមិកអន្តរជាតិ (IAEA) អំពីសកម្មភាពនុយក្លេអ៊ែររបស់ទីក្រុងតេអេរ៉ង់ ដែលត្រូវបានផ្សព្វផ្សាយជាសាធារណៈដោយប្រព័ន្ធផ្សព្វផ្សាយកាលពីថ្ងៃសៅរ៍ចុងសប្ដាហ៍មុននេះ។

លោក Eslami បាននិយាយថាគ្មាននរណាម្នាក់អាចអះអាងថាអ៊ីរ៉ង់ពុំមានសិទ្ធិក្នុងការចម្រាញ់សារធាតុអ៊ុយរ៉ានីញ៉ូមបានឡើយ ដោយសង្កត់ធ្ងន់ថាប្រសិនបើគ្មានការចម្រាញ់សារធាតុអ៊ុយរ៉ានីញ៉ូមនោះនឹងមិនមានវដ្តឥន្ធនៈនុយក្លេអ៊ែរដែលនឹងប៉ះពាល់ដល់ការស្រាវជ្រាវនិងសកម្មភាពអនុវត្តរបស់អ៊ីរ៉ង់នៅទូទាំងវិស័យផ្សេងៗ។

លោកបានសង្កត់ធ្ងន់ថា គ្មានការជំនួសការចម្រាញ់សារធាតុអ៊ុយរ៉ានីញ៉ូមនោះទេ ដោយបន្ថែមថា ការចម្រាញ់គឺជាសិទ្ធិរបស់អ៊ីរ៉ង់ និងជាកត្តាចាំបាច់សម្រាប់ការអភិវឌ្ឍន៍បច្ចេកវិទ្យានុយក្លេអ៊ែរ។

លោកបានបញ្ជាក់ទៀតថា របាយការណ៍ថ្មីៗរបស់ IAEA អំពីសកម្មភាពនុយក្លេអ៊ែររបស់អ៊ីរ៉ង់ត្រូវបានចងក្រងក្រោមឥទ្ធិពលនៃប្រទេសបារាំង អាល្លឺម៉ង់ អង់គ្លេស សហរដ្ឋអាមេរិក និងអ៊ីស្រាអែល៕