គណៈកម្មាធិការរៀបចំការបោះឆ្នោត បាននិយាយនៅព្រឹកព្រលឹមថ្ងៃចន្ទ (០២ មិថុនា) នេះលើគេហទំព័ររបស់ខ្លួនថា បេក្ខភាពបក្សប្រឆាំងជាតិនិយមប៉ូឡូញ លោក Karol Nawrocki បានឈ្នះការបោះឆ្នោតជ្រើសរើសប្រធានាធិបតីជុំទីពីររបស់ប្រទេស ជាមួយនឹងសំឡេងឆ្នោត ៥០,៨៩% ។

គូប្រជែង គឺលោក Rafal Trzaskowski ដែលជាអភិបាលក្រុងវ៉ាសូវី និងជាសម្ព័ន្ធមិត្តរបស់រដ្ឋាភិបាលដឹកនាំដោយលោកនាយករដ្ឋមន្រ្តីប៉ូឡូញ Donald Tusk ទទួលបានសំឡេង ៤៩,១១%។ លោក Nawrocki វ័យ ៤២ឆ្នាំ ដែលជាអ្នករិះគន់សហភាពអឺរ៉ុបជាប្រវត្ដិសាស្រ្ដ បានធ្វើយុទ្ធនាការលើការសន្យាមួយដើម្បីធានាឱ្យបាននូវគោលនយោបាយសេដ្ឋកិច្ច និងសង្គមដែលអនុគ្រោះដល់ប៉ូឡូញ ជាជាងប្រជាជាតិផ្សេងទៀត រួមទាំងជនភៀសខ្លួនមកពីប្រទេសជិតខាងអ៊ុយក្រែនផងដែរ។

សភារបស់ប៉ូឡូញកាន់អំណាចភាគច្រើន ប៉ុន្តែប្រធានាធិបតីក៏អាចវេតូច្បាប់ណាមួយ ហើយការបោះឆ្នោតនេះត្រូវបានតាមដានយ៉ាងជិតស្និទ្ធនៅក្នុងប្រទេសអ៊ុយក្រែន ក៏ដូចជារុស្ស៊ី សហរដ្ឋអាមេរិក និងទូទាំងសហភាពអឺរ៉ុប។

នៅលើវេទិកាប្រព័ន្ធផ្សព្វផ្សាយសង្គម X ប្រធានាធិបតីប៉ូឡូញបច្ចុប្បន្ន លោក Andrzej Duda ដែលជាអ្នកអភិរក្សនិយម បានថ្លែងអំណរគុណដល់ប្រជាជនប៉ូឡូញ ដែលបានចេញទៅបោះឆ្នោតយ៉ាងច្រើន។ គណៈកម្មការរៀបចំការបោះឆ្នោត និយាយថា ចំនួនអ្នកទៅបោះឆ្នោតមាន ៧១,៣១% ដែលជាតួលេខកំណត់ត្រាសម្រាប់ការបោះឆ្នោតជ្រើសរើសប្រធានាធិបតីជុំទីពីរបែបនេះ៕