អ្នកធ្វើធម្មយាត្រាជនជាតិមូស្លីម ជាងមួយលាននាក់ បានសម្រុកធ្វើដំណើរទៅកាន់ទីក្រុង Mecca ដ៏ស័ក្ដិសិទ្ធ របស់អារ៉ាប៊ីសាអ៊ូឌីត នៅមុនពិធីបុណ្យ ហាជី (Haj) ប្រចាំឆ្នាំ ដោយអាជ្ញាធរបានប្តេជ្ញាថានឹងរៀបចំពិធីធម្មយាត្រាប្រកបដោយសុវត្ថិភាពជាងកាលពីលើកមុន ស្របពេលមានកម្ដៅនៅវាលខ្សាច់ដ៏ក្ដៅគគុកយ៉ាងគ្រោះថ្នាក់ និងការបង្រ្កាបដ៏ធំលើភ្ញៀវទេសចរខុសច្បាប់។

សីតុណ្ហភាពត្រូវបានព្យាករថា នឹងឡើងលើសពី ៤០អង្សារសេក្នុងសប្តាហ៍នេះ ខណៈពិធីជួបជុំសាសនា ហាជី ប្រចាំឆ្នាំដ៏ធំបំផុតមួយរបស់ពិភពលោក នឹងចាប់ផ្តើមជាផ្លូវការនៅថ្ងៃទី០៤ ខែមិថុនា។ បុណ្យហាជី ដែលជាសសរស្តម្ភមួយក្នុងចំណោមសសរស្តម្ភទាំងប្រាំនៃសាសនាអ៊ិស្លាម ត្រូវតែអនុវត្តឱ្យបានយ៉ាងហោចណាស់ម្តងជាចាំបាច់ដោយអ្នកកាន់សាសនាអ៊ិស្លាមទាំងអស់។

គិតត្រឹមថ្ងៃទី៣០ ខែឧសភា អ្នកធម្មយាត្រាជាង ១,៣លាននាក់ បានទៅដល់អារ៉ាប៊ីសាអ៊ូឌីត សម្រាប់ធម្មយាត្រាជាច្រើនថ្ងៃ នេះបើយោងតាមក្រុមមន្ត្រី។ ទោះជាស្ថិតក្រោមអាកាសធាតុយ៉ាងក្តៅគគុកក៏ដោយ ពួកអ្នកធ្វើធម្មយាត្រាបានសម្ដែងការត្រេកអរជាខ្លាំងនៅពេលពួកគេទៅដល់ទឹកដីក្រុង Mecca ដើម្បីប្រារព្ធពិធី។

អាជ្ញាធរបានប្រមូលផ្តុំភ្នាក់ងាររដ្ឋាភិបាលជាង ៤០អង្គភាព និងមន្ត្រីចំនួន ២៥០.០០០នាក់ ក្នុងឆ្នាំ២០២៥នេះ ដោយបង្កើនកិច្ចរខិតខំប្រឹងប្រែងទ្វេដងដើម្បីកាត់បន្ថយហានិភ័យទាក់ទងនឹងកម្ដៅ។ ក្នុងឆ្នាំ២០២៤ អ្នកធ្វើធម្មយាត្រាចំនួនជាង ១.៣០០នាក់ ដែលភាគច្រើននៃពួកគេមិនបានចុះឈ្មោះ និងខ្វះការចូលទៅកាន់តំបន់មានម៉ាស៊ីនត្រជាក់ បានស្លាប់ដោយសារតែសីតុណ្ហភាពកើនឡើងដល់ ៥១,៨អង្សារសេ នៅពេលនោះ៕