ភ្នំពេញ៖ រដ្ឋាភិបាលជប៉ុន បានឯកភាពផ្តល់ថវិកាសរុបចំនួនជាង ២៨ម៉ឺនដុល្លារអាមេរិក ដល់អង្គភាពទទួលជំនួយចំនួនបី សម្រាប់ការសាងសង់អាគារសិក្សា និងស្តារប្រព័ន្ធធារាសាស្ត្រ។ ការផ្ដល់ជំនួយនេះ ជាជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចសន្ដិសុខមនុស្សជាតិ។
ការផ្តល់ជំនួយ ត្រូវបានចុះហត្ថលេខានៅថ្ងៃនេះ ដោយឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា និង អ្នកតំណាងអង្គភាពទទួលជំនួយទាំងបី។
រដ្ឋាភិបាលជប៉ុន តាមរយៈជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចសន្ដិសុខមនុស្សជាតិ បានផ្ដល់ជំនួយជាថវិកាជាង ២៨ម៉ឺនដុល្លារសម្រាប់អនុវត្តគម្រោងចំនួន ៣។ គម្រោងទី១ គឺផ្ដល់ជូន មន្ទីរអប់រំ យុវជន និងកីឡា ខេត្តរតនគិរី ដើម្បីសាងសង់អគារសិក្សានៅអនុវិទ្យាល័យអូរយ៉ាដាវ ក្នុងស្រុកអូរយ៉ាដាវ ខេត្តរតនគិរី (ថវិកាចំនួន ៩៨,៣១៧ដុល្លារអាមេរិក)។ គម្រោងនេះ មានអគារសិក្សា១ខ្នង ចំនួន៦បន្ទប់ បំពាក់ដោយគ្រឿងសង្ហារឹមថ្នាក់រៀន បង្គន់អនាម័យចំនួន៤បន្ទប់ និងស៊ីទែនទឹកចំនួន១។
នៅសាលានេះ សិស្សដែលភាគច្រើនជាជនជាតិភាគតិច សិក្សាក្នុងថ្នាក់រៀនដែលមានគ្នាច្រើនកកកុញ ដោយសារកង្វះហេដ្ឋារចនាសម្ព័ន្ធសាលា ដែលអាចបង្កឱ្យមានផលប៉ះពាល់អវិជ្ជមានដល់ការគ្រប់គ្រងថ្នាក់រៀន និងការជំរុញទឹកចិត្តក្នុងការសិក្សា។
គម្រោងនេះនឹងផ្តល់អត្ថប្រយោជន៍ដល់សិស្សចំនួន៤៥៥ នាក់ និងគ្រូបង្រៀនចំនួន ១៥នាក់ តាមរយៈការធ្វើឱ្យប្រសើរឡើងនូវបរិយាកាសសិក្សា និងគុណភាពនៃការអប់រំ។
គម្រោងទី២ គឺផ្ដល់ជូនមន្ទីរអប់រំ យុវជន និងកីឡា ខេត្តស្ទឹងត្រែង ដើម្បីសាងសង់អគារសិក្សានៅសាលាបឋមសិក្សាអូរឫស្សីលើ១ និងសាលាបឋមសិក្សាអូរឫស្សីលើ២ក្នុងស្រុកសៀមបូក ខេត្តស្ទឹងត្រែង(ថវិកាចំនួន៩១,៥៦៦ដុល្លារអាមេរិក)។
គម្រោងនេះនឹងធានាបាននូវបរិយាកាសសិក្សាប្រកបដោយសុវត្ថិភាព និងផាសុកភាពជាងមុន ហើយយើងរំពឹងថា គម្រោងនេះនឹងផ្តល់អត្ថប្រយោជន៍ដល់សិស្សសរុបចំនួន២០១នាក់ និងគ្រូបង្រៀនចំនួន៨នាក់ តាមរយៈការធ្វើឱ្យប្រសើរឡើងនូវគុណភាពនៃការអប់រំ។
គម្រោងទី៣ គឺផ្ដល់ជូនមន្ទីរធនធានទឹក និងឧតុនិយមខេត្តកំពង់ស្ពឺ ដើម្បីស្តារប្រព័ន្ធធារាសាស្ត្រអូរសំបួរក្នុងខេត្តកំពង់ស្ពឺ (ថវិកាចំនួន៩០,៤៩៥ដុល្លារអាមេរិក)។ ជំនួយឥតសំណងនេះ នឹងត្រូវបានប្រើសម្រាប់ស្តារឡើងវិញនូវទំនប់ទឹកចាស់មួយដែលមានស្រាប់ និងលូប្រអប់ចំនួន២កន្លែង នៅស្រុកសំរោងទង ខេត្តកំពង់ស្ពឺ។ គម្រោងនេះនឹងផ្តល់អត្ថប្រយោជន៍ដល់ប្រជាជនក្នុងតំបន់ ជាង៣,៣០០នាក់ តាមរយៈការធានាឱ្យបាននូវការផ្គត់ផ្គង់ទឹកដែលមានស្ថេរភាពសម្រាប់ការរស់នៅ និងសកម្មភាពកសិកម្មនានា៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
