ភ្នំពេញ៖ ផ្លូវថ្មើរជើងចតុមុខនាសប្តាហ៍ទី១៦កន្លងទៅ គឺនៅថ្ងៃទី៣១ ខែឧសភា និងថ្ងៃទី១ ខែ​មិថុនា​នេះ​មានការសម្តែងទស្សនីយភាពសិល្បៈ ល្ខោនខោល និងល្ខោនបាសាក់ ដោយមាន​បង​ប្អូន​ប្រជា​ពលរដ្ឋខ្មែរ រួមទាំងជនជាតិបរទេសបានមកទស្សនា និងដើរលេង​កំសាន្ត​យ៉ាង​ច្រើន​កុះ​ករ មិនខុសពីសប្តាហ៍កន្លងទៅឡើយ។

លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យសាលារាជធានីភ្នំពេញបានឱ្យដឹងថា សំរាប់​សប្តាហ៍នេះ (នាថ្ងៃទី៣១ ខែឧសភា និងទី០១ ខែមិថុនា)​នៅ​លើ​ផ្លូវ​ថ្មើរ​ជើង​ចតុមុខ​(Walk Street) បានលើកយកនូវផ្ទាំងទស្សនីយភាពសិល្បៈពីរ ដើម្បីសម្ដែងជូនភ្ញៀវជាតិ អន្តរជាតិ និងពុក ម៉ែ បងប្អូន ទាំងអស់គ្នាបានទស្សនា នាផ្លូវថ្មើរជើងចតុមុខ( Walk Street ) ទី១/ ទស្សនីយភាពសិល្បៈ ល្ខោនខោល, ទី២/ ទស្សនីយភាពសិល្បៈ ល្ខោនបាសាក់”។

ផ្លូវថ្មើរជើងចតុមុខ (Walk Street) គ្រោងនឹងបើកសម្ពោធជាផ្លូវការ នាថ្ងៃ​ទី២១ ខែ​មិថុនា​ឆ្នាំ​២០២៥​ខាងមុខនេះ ក្រោមអធិបតីភាពដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយក​រដ្ឋមន្ត្រី ក្រោយពីផ្លូវថ្មើរជើងនេះបានបើកឱ្យដំណើរការជាបណ្តោះអាសន្នអស់ជាង៤ខែ ហើយ​ទទួល​បាន​ការគាំទ្រនិងពេញនិយមយ៉ាងខ្លាំងពីសំណាក់ប្រជាពលរដ្ឋ និងភ្ញៀវជាតិ-អន្តរជាតិ ដោយ​ពួកគេមកដើរលែងកំសាន្តយ៉ាងកុះករ ក្នុងទឹកមុខសប្បាយរីករាយ ជាមួយនឹងចំណីអាហារ ត្រូវ​បានរៀបចំកាន់តែសម្បូរបែបពីមួយសប្តាហ៍ទៅមួយសប្តាហ៍។

បច្ចុប្បន្ន​ផ្លូវថ្មើរជើងចតុមុខ(Walk Street) គឺជាទីដ៏ពេញនិយមរបស់ប្រជាជនខ្មែរ រួមទាំង​ជន​ជាតិ​បរទេស។ ពីមួយសប្តាហ៍ ទៅមួយសប្តាហ៍មានអ្នកទៅលេងកម្សាន្តរាប់ពាន់នាក់ ព្រម​ទាំង​មាន​ការ​បង្ហាញពីវប្បធម៌ខ្មែរជាច្រើនរួមទាំងការកម្សាន្ត និងម្ហូបអាហារចម្រុះ ជាពិសេស នំ​បញ្ចុក​ខ្មែរ ជាអាហារដ៏ពេញនិយមនៅទីនោះ ដោយមានរាប់សិបកន្លែង៕