ការស្ទង់មតិឯកជនបានបង្ហាញនៅថ្ងៃចន្ទ (០២ មិថុនា) នេះថា សកម្មភាពរោងចក្រនៅអាស៊ី បានធ្លាក់ចុះនៅក្នុងខែឧសភា ដោយសារតម្រូវការទន់ខ្សោយនៅក្នុងប្រទេសចិន និងផលប៉ះពាល់នៃពន្ធរបស់សហរដ្ឋអាមេរិក បានធ្វើឱ្យក្រុមហ៊ុនជាច្រើនមានការខាតបង់យ៉ាងធ្ងន់ធ្ងរ។

ជប៉ុន និងកូរ៉េខាងត្បូង ដែលពឹងផ្អែកលើពាណិជ្ជកម្ម បានបន្តមើលឃើញការធ្លាក់ចុះនៃសកម្មភាពផលិតកម្ម PMI នៅក្នុងខែឧសភា — ពោលគឺ PMI ជប៉ុនឈរនៅអត្រា ៤៩,៤ ក្នុងខែឧសភា ហើយកូរ៉េខាងត្បូង នៅកម្រិត ៤៧,៧ — ខណៈពន្ធលើរថយន្តរបស់លោកប្រធានាធិបតីអាមេរិក Donald Trump ធ្វើឱ្យប៉ះពាល់ដល់ការរំពឹងទុកសម្រាប់ការនាំចេញ។

បន្ថែមពីលើភាពអាប់អួរនោះ ការស្ទង់មតិផ្លូវការមួយកាលពីថ្ងៃសៅរ៍ចុងសប្ដាហ៍ បានបង្ហាញពីសកម្មភាពផលិតកម្មរបស់ចិន ធ្លាក់ចុះនៅក្នុងខែឧសភា សម្រាប់ខែទីពីរជាប់គ្នា ដែលជាសញ្ញានៃភាពទន់ខ្សោយក្នុងសេដ្ឋកិច្ចធំបំផុតទីពីររបស់ពិភពលោក។ ក្រុមអ្នកវិភាគនិយាយថា ជាមួយនឹងសេដ្ឋកិច្ចអាស៊ីជាច្រើនមានការរីកចម្រើនតិចតួចក្នុងការចរចាពាណិជ្ជកម្មជាមួយសហរដ្ឋអាមេរិក ភាពមិនច្បាស់លាស់នឹងបន្តបង្អាក់ក្រុមហ៊ុនពីការជំរុញផលិតកម្ម ឬការចំណាយ។

ជាមួយគ្នានេះ ការស្ទង់មតិឯកជនក៏ង្ហាញថា វៀតណាម ឥណ្ឌូនេស៊ី និងកោះតៃវ៉ាន់ បានមើលឃើញសកម្មភាពរោងចក្ររបស់ខ្លួនរអិលចុះនៅក្នុងខែឧសភាផងដែរ ដោយសារតែពន្ធគយ និងភាពមិនច្បាស់លាស់របស់លោក Trump លើគោលនយោបាយពាណិជ្ជកម្មរបស់សហរដ្ឋអាមេរិក បានដាក់បន្ទុកលើការនាំចេញ និងសកម្មភាពសាជីវកម្ម៕