រដ្ឋមន្ត្រីក្រសួងមហាផ្ទៃបារាំង លោក Bruno Retailleau បានថ្កោលទោសចំពោះអំពើបំផ្លិចបំផ្លាញ ប្រឆាំងនឹងគ្រឹះស្ថានជនជាតិជ្វីហ្វចំនួន ៥ នៅក្នុងទីក្រុងប៉ារីស។ នេះបើយោងតាមសារព័ត៌មានបារាំង France 24។

លោក Retailleau បាននិយាយនៅលើគណនី X របស់ខ្លួនថា៖«ខ្ញុំពិតជាស្អប់ខ្ពើមយ៉ាងខ្លាំងចំពោះទង្វើដ៏អាក្រក់ទាំងនេះ ដែលកំណត់គោលដៅទៅលើសហគមន៍ជ្វីហ្វ»។

អភិបាលក្រុងប៉ារីសលោកស្រី Anne Hidalgo ក៏បានថ្កោលទោសចំពោះទង្វើនៃ«ការបំភិតបំភ័យ» ក្នុងលក្ខខណ្ឌដ៏ខ្លាំងក្លាបំផុត។

លោកស្រីត្រូវបានដកស្រង់សម្តីដោយសារព័ត៌មានFrance 24 ដែលបាននិយាយថា៖«ការប្រឆាំងនឹងជនជាតិជ្វីហ្វ មិនអាចទទួលយកបាន នៅក្នុងទីក្រុងរបស់យើង ឬនៅក្នុងសាធារណរដ្ឋរបស់យើងទេ»។

បុរសមិនស្គាល់មុខម្នាក់ បានបំផ្លិចបំផ្លាញនៅពេលយប់ពីថ្ងៃសុក្រដល់ថ្ងៃសៅរ៍ ជាមួយនឹងការលាបពណ៌បៃតងនៅកន្លែងរំលឹកអំពីវិនាសសកម្មនៃការសម្លាប់រង្គាល នៅក្នុងទីក្រុងប៉ារីស វិហារជ្វីហ្វចំនួនពីរ និងភោជនីយដ្ឋានជ្វីហ្វមួយកន្លែង។

យោងតាមបណ្តាញព័ត៌មានបារាំង សហគមន៍ជនជាតិជ្វីហ្វបារាំង ដែលជាសហគមន៍ដ៏ធំបំផុតមួយ ក្នុងពិភពលោក អស់រយៈពេលជាច្រើនខែ បានឈានទៅដល់ការប្រឈមនឹងការកើនឡើងនៃការវាយប្រហារ និងការបំផ្លិចបំផ្លាញនៃទីតាំងប្រវត្តិសាស្ត្រ ចាប់តាំងពីសង្រ្គាមហ្កាហ្សា បានផ្ទុះឡើង កាលពីថ្ងៃទី ០៧ ខែតុលា ឆ្នាំ ២០២៣។

អ៊ីស្រាអែលបានបើកការវាយលុកតាមផ្លូវដី និងផ្លូវអាកាស នៅតំបន់ហ្កាហ្សា បន្ទាប់ពីការវាយប្រហារកាលពីថ្ងៃទី ០៧ ខែតុលា ឆ្នាំ ២០២៣ ដែលក្នុងនោះ ក្រុមយុទ្ធជនដឹកនាំដោយក្រុមហាម៉ាស បានសម្លាប់មនុស្សប្រហែល ១.២00នាក់ និងចាប់ចំណាប់ថ្នូរ ២៥១នាក់។ នេះបើយោងតាមតួលេខរបស់អ៊ីស្រា    អែល។