សមាជិកព្រឹទ្ធសភាជាន់ខ្ពស់អាមេរិក ២រូប បានព្រមានកាលពីថ្ងៃអាទិត្យ (ទី១ ខែមិថុនា) ថា ប្រធានាធិបតីរុស្ស៊ី លោក Vladimir Putin កំពុងពន្យារពេលដំណើរការចរចាសន្តិភាព ខណៈកំពុងរៀបចំការវាយលុកយោធាថ្មី នៅប្រទេសអ៊ុយក្រែន ដោយលើកហេតុផលថា ២សប្តាហ៍ខាងមុខ អាចពេលវេលាដ៏សំខាន់ ក្នុងការកំណត់អនាគតនៃសង្រ្គាមដែលបានផ្ដល់ផលអាក្រក់ធ្ងន់ធ្ងររួចហើយ ដូចជាបំផ្លិចបំផ្លាញទីក្រុងនានា នាំឲ្យមានភៀសខ្លួនរាប់លាននាក់ និងធ្វើឲ្យសន្តិសុខនៅអឺរ៉ុបប្រែប្រួល។

សមាជិកព្រឹទ្ធសភាមកពីបក្សសាធារណរដ្ឋ លោក Lindsey Graham និងបក្សប្រជាធិបតេយ្យ លោក Richard Blumenthal បាននិយាយទៅកាន់សារព័ត៌មាន Associated Press (AP) នៅទីក្រុងប៉ារីស ប្រទេសបារាំង បន្ទាប់ពីបានជួបជាមួយប្រធានាធិបតីអ៊ុយក្រែន លោក Volodymyr Zelenskyy និងធ្វើដំណើរ ជុំវិញតំបន់នានាដែលត្រូវបានបំផ្លាញដោយអ្វីដែលពួកលោកហៅថា ការទម្លាក់គ្រាប់បែកដ៏អាក្រក់បំផុតរបស់រុស្ស៊ី គិតចាប់តាំងពីការលុកលុយពេញបន្ទុកបានចាប់ផ្តើមឡើង។

នៅទីក្រុងប៉ារីស សម្រាប់ការពិភាក្សាជាមួយប្រធានាធិបតីបារាំង លោក Emmanuel Macron ដែលពួកលោក និយាយថា «មានការយល់ស្របគ្នា ១០០ភាគរយ» ពាក់ព័ន្ធនឹងសង្គ្រាមនេះ សមាជិកព្រឹទ្ធសភាបានព្រមានថា មានពេលវេលាតិចតួចណាស់ ក្នុងការទប់ស្កាត់ការវាយលុកជាថ្មី ដែលកំពុងជិតកើតឡើង។

ជាមួយគ្នានេះ ពួកលោកបានបន្តថា សេចក្ដីស្នើច្បាប់ដាក់ទណ្ឌកម្មរបស់សហរដ្ឋអាមេរិក អាចជាឱកាសចុងក្រោយរបស់ប្រទេសលោកខាងលិច ក្នុងការរារាំងលំហូរសេដ្ឋកិច្ចជួយដល់សង្រ្គាមរបស់វិមានក្រឹមឡាំង ដោយបន្ថែមថា ពួកលោកសង្ឃឹមថា ការបានឃើញផ្ទាល់របស់ពួកលោក នឹងជួយឲ្យសន្ទុះប្រែប្រួល នៅទីក្រុងវ៉ាស៊ីនតោន ហើយជួយឲ្យលោកប្រធានាធិបតី Donald Trump បាត់សង្ស័យ និងគាំទ្រច្បា់នោះ។

លោក Graham បាននិយាយអំពីលោក Putin ថា៖ «អ្វីដែលខ្ញុំបានរៀននៅក្នុងការធ្វើដំណើរនេះ គឺលោកកំពុងរៀបចំសម្រាប់សង្រ្គាមបន្ថែមទៀត»។ ចំណែកលោក Blumenthal បានហៅការដាក់ទណ្ឌកម្មដែលបានស្នើឡើងនៅក្នុងសេចក្ដីស្នើច្បាប់ថា ជា «ទណ្ឌកម្មធ្ងន់ធ្ងរ» ហើយបាននិយាយថា វានឹងធ្វើឲ្យពាណិជ្ជកម្មរបស់រុស្ស៊ីនៅដាច់ពីគេឯង»៕