ភាពតានតឹងពាណិជ្ជកម្ម និងការធ្លាក់ចុះនៃទំនុកចិត្តរបស់អ្នកប្រើប្រាស់ ចំពេលមានភាពមិនប្រាកដប្រជាផ្នែកនយោបាយ និងសេដ្ឋកិច្ច បានបន្ទច់បង្អាក់ដល់តម្រូវការដែលត្រូវបានព្យាករថា ខ្លាំង សម្រាប់ការធ្វើដំណើរតាមផ្លូវអាកាស។

បើទោះបីជាក្រុមហ៊ុនអាកាសចរណ៍ត្រូវបានគេរំពឹងថា នឹងដឹកអ្នកដំណើរចំនួន ៤,៩៩ពាន់លាននាក់ ក្នុងឆ្នាំ២០២៥ ពោលគឺកើនឡើង ៤ភាគរយច្រើនជាងឆ្នាំ២០២៤ ក៏ដោយ ក៏ការព្យាករចុងក្រោយបំផុត គឺតិចជាងកម្រិត ៥,២២ពាន់លាននាក់ ដែលត្រូវបានព្យាករដោយសមាគមដឹកជញ្ជូនអាកាសយានដ្ឋានអន្តរជាតិ (Iata) ក្នុងខែធ្នូ ឆ្នាំ២០២៤។ តែយ៉ាងណាក្ដី ក្រុមហ៊ុនអាកាសចរណ៍ត្រូវបានគេរំពឹងថា នឹងអាចទទួលបានប្រាក់ចំណេញខ្ពស់ជាងនេះ បើទោះបីជាមានបញ្ហាប្រឈមក៏ដោយ។

Iata ដែលជាស្ថាប័នពាណិជ្ជកម្មសកលតំណាងឲ្យក្រុមហ៊ុនដឹកជញ្ជូនចំនួន ៣៥០ក្រុមហ៊ុន បានលើកឡើងថា ប្រាក់ចំណេញសុទ្ធរបស់ក្រុមហ៊ុនអាកាសចរណ៍ត្រូវបានគេប៉ាន់ប្រមាណថា នឹងមានចំនួន ៣៦ពាន់លានដុល្លារ ក្នុងឆ្នាំ២០២៥ ពោលគឺកើនឡើងពីចំនួន ៣២,៤ពាន់លានដុល្លារ ក្នុងឆ្នាំ២០២៤ ប៉ុន្តែទាបជាងការព្យាករពីមុនចំនួន ៣៦,៦ពាន់លានដុល្លារ សម្រាប់ឆ្នាំ២០២៥។ កម្រិតល្អៀងនៃប្រាក់ចំណេញសុទ្ធត្រូវបានគេរំពឹងថា នឹងកើនឡើងដល់ ៣,៧ភាគរយ នៅឆ្នាំ២០២៥ ដោយកើនឡើងពីកម្រិត ៣,៤ភាគរយ ក្នុងឆ្នាំ២០២៤។

Iata បានឲ្យដឹងទៀតថា អាស៊ីប៉ាស៊ីហ្វិក គឺជាទីផ្សារធ្វើដំណើរតាមផ្លូវអាកាសដ៏ធំបំផុត ហើយតម្រូវការអ្នកដំណើរ នៅក្នុងតំបន់ ត្រូវបានគេរំពឹងថា នឹងមានភាពរឹងមាំ ដោយសារការបន្ធូរបន្ថយតម្រូវការទិដ្ឋាការ នៅក្នុងប្រទេសអាស៊ីមួយចំនួន ដូចជា ចិន វៀតណាម ម៉ាឡេស៊ី និងថៃ។ តែយ៉ាងណាក្ដី សមាគមនេះបានកត់សម្គាល់ពីបញ្ហាប្រឈមផ្នែកសេដ្ឋកិច្ច ខណៈដែលការព្យាករផលិតផល ក្នុងស្រុកសរុប សម្រាប់តំបន់ ជាពិសេសសម្រាប់ប្រទេសចិន ត្រូវបានកែសម្រួលឲ្យនៅកម្រិតទាប៕