ប្រទេសកូរ៉េខាងជើង នៅថ្ងៃចន្ទ (ទី២ ខែមិថុនា) នេះ បានការពារកិច្ចសហប្រតិបត្តិការយោធារបស់ខ្លួនជាមួយរុស្ស៊ី ដោយលើកឡើងថា ទំនាក់ទំនងនេះ មានគោលបំណង «ធានាសន្តិភាព និងស្ថិរភាព» នៅអឺរ៉ុប និងអាស៊ី។

គួរបញ្ជាក់ថា ប្រទេសទាំង២ បានពង្រឹងកិច្ចសហប្រតិបត្តិការយោធា ក្នុងប៉ុន្មានឆ្នាំថ្មីៗនេះ ដោយទីក្រុងព្យុងយ៉ាង បានផ្គត់ផ្គង់សព្វាវុធ និងកងទ័ព ដើម្បីគាំទ្រដល់សង្គ្រាមរបស់ទីក្រុងមូស្គូ ប្រឆាំងនឹងអ៊ុយក្រែន។

យោងតាមសមាជិកសភាកូរ៉េខាងត្បូង លោក Lee Seong-kweun បានឲ្យដឹងថា ទាហានកូរ៉េខាងជើងប្រហែល ៦០០នាក់ ត្រូវបានសម្លាប់ និងរាប់ពាន់នាក់ទៀតរងរបួស អំឡុងពេលប្រយុទ្ធរួមជាមួយរុស្ស៊ី។ ក្រុមឃ្លាំមើលការដាក់ទណ្ឌកម្មពហុភាគី រួមមានកូរ៉េខាងត្បូង សហរដ្ឋអាមេរិក ជប៉ុន និងប្រទេសចំនួន ៨ផ្សេងទៀត កាលពីថ្ងៃសុក្រ បានថ្កោលទោសទំនាក់ទំនងទាំងនោះថា «ខុសច្បាប់»។

ជាការឆ្លើយតប ទីក្រុងព្យុងយ៉ាងបាននិយាយថា កិច្ចសហប្រតិបត្តិការរបស់ខ្លួនជាមួយទីក្រុងមូស្គូ គឺ «សំដៅដល់ការពារអធិបតេយ្យភាព បូរណភាពទឹកដី និងផលប្រយោជន៍សន្តិសុខរបស់រដ្ឋ» ក៏ដូចជា «ការធានាសន្តិភាព និងស្ថិរភាព នៅក្នុងតំបន់អឺរ៉ុប-អាស៊ី»។

សេចក្តីថ្លែងការណ៍ពីមន្ត្រីក្រសួងការបរទេស បានពណ៌នាទំនាក់ទំនងជាមួយរុស្ស៊ីថា ជា «ទំនាក់ទំនងអន្តររដ្ឋ»។ សេចក្ដីថ្លែងការណ៍បានបន្ថែមថា ទីក្រុងព្យុងយ៉ាង និងមូស្គូអាច «បង្កើតសណ្តាប់ធ្នាប់ពិភពលោកពហុប៉ូល ដោយផ្អែកលើការគោរពយ៉ាងពិតប្រាកដ ចំពោះអធិបតេយ្យភាព សមភាព និងយុត្តិធម៌»៕