អាជ្ញាធរលីប៊ី បាននិយាយកាលពីថ្ងៃអាទិត្យថា ពួកគេបានចាប់ខ្លួនជនអន្តោប្រវេសន៍ខុសច្បាប់ចំនួន ៥០ នាក់ មកពីប្រទេសអាហ្វ្រិកផ្សេងៗគ្នា នៅវាលខ្សាច់ ជិតភូមិ Nasmah មានចម្ងាយប្រហែល ២៣០ គីឡូម៉ែត្រភាគខាងត្បូងនៃរដ្ឋធានីទ្រីប៉ូលី។

ក្រសួងមហាផ្ទៃលីប៊ី បាននិយាយនៅក្នុងសេចក្តីថ្លែងការណ៍មួយដែលបានចេញផ្សាយនៅលើគេហទំព័រហ្វេសប៊ុកថា៖«ការល្បាតរបស់ឆ្មាំព្រំដែន ត្រូវបានដាក់ពង្រាយនៅតំបន់ជ្រលងភ្នំដែលពិបាកចូលទៅដល់ នៅក្បែរភូមិ Nasmah ក្នុងគោលបំណងអនុវត្តផែនការសន្តិសុខ នៅក្នុងតំបន់នេះ និងគ្រប់គ្រងលំហូរជនអន្តោប្រវេសន៍ខុសច្បាប់ តាមរយៈផ្លូវវាលខ្សាច់ដ៏លំបាក»។

ក្រសួងបានបញ្ជាក់ថា ជនអន្តោប្រវេសន៍ចំនួន ៥០នាក់ ដែលត្រូវបានចាប់ខ្លួន «ត្រូវបានផ្តល់ដោយជំនួយមនុស្សធម៌ និងជំនួយដំបូង មុនពេលពួកគេត្រូវបានប្រគល់ទៅមជ្ឈមណ្ឌលទទួលជនអន្តោប្រវេសន៍ ដើម្បីបំពេញនីតិវិធីច្បាប់ដែលចាំបាច់»។

ដោយសារភាពអសន្តិសុខ និងភាពចលាចលដែលកើតឡើង ក្រោយការបណ្តេញមេដឹកនាំកាន់យូរលោក Muammar Gaddafi ចេញពីតំណែងក្នុងឆ្នាំ ២០១១ ប្រទេសលីប៊ីបានក្លាយជាចំណុចដ៏សំខាន់សម្រាប់ជនអន្តោប្រវេសន៍ដែលស្វែងរកឆ្លងសមុទ្រមេឌីទែរ៉ាណេ ឆ្ពោះទៅកាន់ច្រាំងអឺរ៉ុប។

រហូតមកដល់ពេលនេះ ជនអន្តោប្រវេសន៍ចំនួន ៩.២៨៥នាក់ ត្រូវបានស្ទាក់ចាប់ និងបញ្ជូនត្រឡប់ទៅប្រទេសលីប៊ីវិញ ខណៈដែលជនអន្តោប្រវេសន៍ចំនួន ១៦០នាក់ បានស្លាប់ និង២៣៤នាក់ផ្សេងទៀត បានបាត់ខ្លួន នៅលើផ្លូវមេឌីទែរ៉ាណេភាគកណ្តាល។ នេះបើយោងតាមទិន្នន័យពីអង្គការទេសន្តរប្រវេសន៍អន្តរជាតិ។