ក្រសួងការបរទេសអ៊ីរ៉ង់ នៅថ្ងៃចន្ទ (ទី២ ខែមិថុនា) នេះ បានប្រាប់ថា ខ្លួននឹងត្រូវរង់ចាំមើលថា តើមានការកែប្រែគោលជំហរដែរ ឬទេ សម្រាប់សហរដ្ឋអាមេរិក ពាក់ព័ន្ធនឹងទណ្ឌកម្ម ខណៈដែលប្រទេសទាំង២ ចរចារកិច្ចព្រមព្រៀង ដើម្បីដោះស្រាយជម្លោះដ៏យូរអង្វែង ជុំវិញមហិច្ឆតានុយក្លេអ៊ែររបស់អ៊ីរ៉ង់។

អំឡុងសន្និសីទសារព័ត៌មានប្រចាំសប្តាហ៍ នៅទីក្រុងតេអេរ៉ង់ អ្នកនាំពាក្យក្រសួង លោក Esmaeil Baghaei បានឲ្យដឹងថា៖ «ខ្ញុំសោកស្តាយ ដែលត្រូវជូនដំណឹងដល់អ្នកទាំងអស់គ្នាថា ភាគីអាមេរិកមិនទាន់មានឆន្ទៈ ក្នុងការបំភ្លឺអំពីបញ្ហានេះនៅឡើយទេ»។ លោកបានបន្ថែមថា៖ «វាត្រូវតែមានភាពច្បាស់លាស់ សម្រាប់ពួកយើង អំពីថា តើទណ្ឌកម្មគាបសង្កត់លើប្រជាជនអ៊ីរ៉ង់ នឹងត្រូវបានលុបចោលដែរ ឬទេ ដើម្បីធានាឲ្យបានថា ហេតុការណ៍កន្លងមក នឹងមិនកើតឡើងម្តងទៀតឡើយ»។

រដ្ឋមន្ត្រីការបរទេសអូម៉ង់ លោក Sayyid Badr Albusaidi ដែលកំពុងធ្វើការសម្រុះសម្រួល រវាងអ៊ីរ៉ង់ និងរដ្ឋបាលរបស់លោកប្រធានាធិបតីអាមេរិក Donald Trump បានបង្ហាញនូវចំណុចសំខាន់នៃសំណើរបស់សហរដ្ឋអាមេរិក សម្រាប់កិច្ចព្រមព្រៀងនុយក្លេអ៊ែរ រវាងទីក្រុងតេអេរ៉ង់ និងទីក្រុងវ៉ាស៊ីនតោន អំឡុងទស្សនកិច្ចរយៈពេលខ្លី នៅទីក្រុងតេអេរ៉ង់ កាលពីថ្ងៃសៅរ៍ចុងសប្ដាហ៍កន្លងមក។

គណៈប្រតិភូអ៊ីរ៉ង់ និងសហរដ្ឋអាមេរិក បានបញ្ចប់កិច្ចពិភាក្សាជុំទី៥ នៅទីក្រុងរ៉ូម ប្រទេសអ៊ីតាលី កាលពីខែមុន ហើយបើទោះបីជាសញ្ញានៃវឌ្ឍនភាពតិចតួចបានលេចឡើងក៏ដោយ ក៏មានចំណុចខ្វែងគំនិតគ្នាជាច្រើនដែលពិបាកនឹងឈានដល់ការព្រមព្រៀង ជាពិសេសបញ្ហានៃការចម្រាញ់សារធាតុអ៊ុយរ៉ាញ៉ូមរបស់អ៊ីរ៉ង់៕