អ្នកការទូតជាន់ខ្ពស់របស់អ៊ីស្រាអែល នៅថ្ងៃចន្ទ (ទី២ ខែមិថុនា) នេះ បានថ្កោលទោសការវាយប្រហារកាលពីចុងសប្តាហ៍ លើក្រុមបាតុករ នៅរដ្ឋ Colorado របស់សហរដ្ឋអាមេរិក ជាការតវ៉ាដែលទាមទារឲ្យមានការដោះលែងចំណាប់ថ្នូរជាប់ឃុំខ្លួននៅតំបន់ហ្កាហ្សា ដោយបានចោទប្រកាន់ថា ទង្វើនេះត្រូវបានបញ្ឆេះដោយប្រព័ន្ធផ្សព្វផ្សាយ។

លោក Gideon Saar បានសរសេរនៅលើបណ្ដាញសង្គម X ថា៖ «មានអារម្មណ៍តក់ស្លុតដោយសារការវាយប្រហារភេរវកម្មប្រឆាំងជនជាតិជីហ្វដ៏គួរឲ្យរន្ធត់ នៅទីក្រុង Boulder រដ្ឋ Colorado»។ ហើយដោយមិនបានបញ្ជាក់ឲ្យបានលម្អិត លោកបានបន្ថែមថា៖ «នេះគឺជាទង្វើប្រឆាំងជនជាតិជ្វីហ្វសុទ្ធសាធដែលត្រូវបានជំរុញដោយការចោទប្រកាន់ដ៏គ្រោះថ្នាក់ដែលរាលដាលតាមប្រព័ន្ធផ្សព្វផ្សាយ»។

ចំណែកមេដឹកនាំប្រឆាំងរបស់អ៊ីស្រាអែល លោក Yair Lapid បានថ្កោលទោស «អំពើហិង្សាប្រឆាំងជនជ្វីហ្វ»។ លោកបានសរសេរនៅលើបណ្ដាញសង្គម X ថា៖ «យើងទាំងអស់គ្នារន្ធត់នឹងការវាយប្រហារភេរវកម្មដោយហិង្សានៅរដ្ឋ Colorado ប្រឆាំងនឹងក្រុមបាតុករ ដែលគ្រាន់តែធ្វើការអំពាវនាវដោយសន្តិវិធីឲ្យមានការដោះលែងចំណាប់ថ្នូររបស់យើង»។

គួរបញ្ជាក់ថា មនុស្សជាច្រើននាក់បានរងរបួសដោយរលាក និងរបួសផ្សេងទៀត កាលពីថ្ងៃអាទិត្យ (ទី១ ខែមិថុនា) ក្នុងរដ្ឋ Colorado សហរដ្ឋអាមេរិក ជាអ្វីដែល FBI (ទីភ្នាក់ងារស៊ើបអង្កេតសហព័ន្ធ) ហៅថា «ការវាយប្រហារភេរវកម្មមានគោលដៅ» ប្រឆាំងនឹងបាតុករដែលស្វែងរកការដោះលែងចំណាប់ថ្នូរអ៊ីស្រាអែលដែលជាប់ឃុំខ្លួននៅតំបន់ហ្កាហ្សា៕