នៅទីក្រុង Mokwa ស្ថិតក្នុងរដ្ឋ Niger ប្រទេសនីហ្សេរីយ៉ា លោក Adamu Yusuf គឺជាអ្នករស់រានមួយរូបពីគ្រោះទឹកជំនន់ បានដើរកាត់ភក់ និងកម្ទេចកម្ទីកាលពីថ្ងៃអាទិត្យ ជាទីដែលផ្ទះរបស់លោករងការបំផ្លិចបំផ្លាញដោយសារទឹកជំនន់កាលពីថ្ងៃពុធ ។

លោក Yusuf និយាយប្រាប់ទីភ្នាក់ងារព័ត៌មានរ៉យទ័រថា លោកមានសមាជិកគ្រួសារ ១៥រូបនៅក្នុងផ្ទះ ។ ជាអកុសល សមាជិក ៩នាក់ក្នុងចំណោមពួកគេបានស្លាប់ នៅក្នុងទឹកជំនន់ និងសមាជិក ៨នាក់ផ្សេងទៀត នៅបាត់ខ្លួន ។ មានសាកសពតែម្នាក់គត់ត្រូវបានរកឃើញ ហើយផ្ទះរបស់ពួកយើងត្រូវបានទឹកជំនន់ហូរនាំយកទៅទាំងស្រុង ។ លោកបាត់បង់អ្វីៗគ្រប់បែបយ៉ាងទាំងអស់ ភរិយារបស់លោក ម្តាយរបស់លោក កូនៗរបស់លោក និងសាច់ញាតិផ្សេងទៀត កំពុងបាត់ខ្លួនទាំងអស់ ។

លោក Audu Hussaini គឺជាប្រធានផ្នែកព័ត៌មាននៅទីភ្នាក់ងារគ្រប់គ្រងសង្រ្គោះបន្ទាន់រដ្ឋ Niger និយាយថា មនុស្សយ៉ាងហោច ១៥១នាក់ បានស្លាប់ និងមនុស្សរាប់ម៉ឺននាក់ផ្សេងទៀត ត្រូវបានជម្លៀសខ្លួនដោយសារទឹកជំនន់ដែលបានវាយប្រហាររដ្ឋ Niger កាលពីថ្ងៃពុធ និងថ្ងៃព្រហស្បតិ៍ ។

កាលពីថ្ងៃអាទិត្យម្សិលមិញ ប្រជាពលរដ្ឋនាំគ្នាប្រមែរប្រមូលឈើបែកបាក់ និងដំបូលស័ង្កសីពីផ្ទះរងការខូចខាតរបស់ពួកគេ ខណៈពលរដ្ឋផ្សេងទៀត សាងសង់ខ្ទមថ្មី ហើយប្រតិបត្តិការរុករកសាកសពនៅតែបន្ត ។

សូមបញ្ជាក់ថា ប្រទេសនីហ្សេរីយ៉ា ងាយរងគ្រោះដោយសារទឹកជំនន់អំឡុងរដូវវស្សាដែលបានចាប់ផ្តើមកាលពីខែមេសា ។

កាលពីឆ្នាំ ២០២២ រលកនៃទឹកជំនន់ដ៏អាក្រក់បំផុតនៅក្នុងប្រទេសមួយនេះនារយៈពេលជាង ១ទសវត្សរ៍ បានសម្លាប់មនុស្សជាង ៦០០នាក់ មនុស្សប្រហែល ១,៤លាននាក់ ត្រូវបានជម្លៀស និងបំផ្លិចបំផ្លាញដីកសិកម្ម ៤៤ម៉ឺនហិចតា ៕