នាយករដ្ឋមន្ត្រីដាណឺម៉ាក លោកស្រី Mette Frederiksen នាថ្ងៃចន្ទ (ទី២ ខែមិថុនា) បានលើកឡើងថា ការវាយប្រហាររបស់អ៊ុយក្រែន ប្រឆាំងនឹងមូលដ្ឋានទ័ពអាកាសរុស្ស៊ីជាច្រើន កាលពីថ្ងៃអាទិត្យចុងសប្ដាហ៍កន្លងមក បង្ហាញថា ទីក្រុងគីវ ទទួលបានជោគជ័យក្នុងការការពារខ្លួន។

នៅពេលត្រូវបានសួរឲ្យអត្ថាធិប្បាយ ជុំវិញការវាយប្រហាររបស់អ៊ុយក្រែន លោកស្រី Frederiksen បានប្រាប់ថា៖ «ខ្ញុំគិតថា ពួកគេ (អ៊ុយក្រែន) មានសិទ្ធិការពារខ្លួន ហើយជួនកាល វារួមបញ្ចូលទាំងការវាយបកត្រលប់វិញផងដែរ ដូច្នេះវាហាក់ដូចជាការទទួលបានជោគជ័យ»។

សេវាស៊ើបការណ៍សម្ងាត់ក្នុងស្រុករបស់អ៊ុយក្រែន ឬ SBU បានទទួលស្គាល់ថា ខ្លួនបានធ្វើការវាយប្រហារនេះ ដែលមានឈ្មោះថា «Operation Spider's Web» ដែលបានគ្រោងទុកអស់រយៈពេលជាង ១ឆ្នាំកន្លះ។

នៅឯកិច្ចប្រជុំនៃមេដឹកនាំបណ្ដាប្រទេសអឺរ៉ុបខាងជើង បាល់ទិក និងអឺរ៉ុបខាងកើតក្នុងរដ្ឋធានីរបស់ប្រទេសលីទុយអានី នាថ្ងៃចន្ទនេះ លោកស្រី Frederiksen ក៏បាននិយាយផងដែរថា វាមានសារៈសំខាន់ណាស់ ក្នុងការផ្តោតលើការបង្កើតអឺរ៉ុបឡើងវិញ។

លោកស្រីបានសង្កត់ធ្ងន់ថា៖ «រុស្ស៊ីគឺជាការគំរាមកំហែង ចំពោះយើងទាំងអស់គ្នា ដូច្នេះហើយយើងត្រូវពង្រឹងផ្នែកខាងកើតរបស់យើង។ យើងត្រូវជំរុញឲ្យមានបទឈប់បាញ់ ប៉ុន្តែក្នុងពេលជាមួយគ្នានេះ យើងត្រូវធ្វើអ្វីដែលចាំបាច់ សម្រាប់សមរភូមិ នៅប្រទេសអ៊ុយក្រែន ដើម្បីឲ្យពួកគេពិតជាអាចឈ្នះសង្រ្គាមនេះ»៕