កិច្ចប្រជុំត្រីភាគី រវាងគណៈប្រតិភូមកពីប្រទេសទួរគី រុស្ស៊ី និងអ៊ុយក្រែន បានចាប់ផ្តើមនៅថ្ងៃចន្ទ (ទី២ ខែមិថុនា) នេះ នៅវិមាន Ciragan ក្នុងទីក្រុងអ៊ីស្តង់ប៊ុល (Istanbul) ដោយនេះជាជុំទី២ នៃកិច្ចចរចាសន្តិភាពដោយផ្ទាល់។

កិច្ចពិភាក្សានេះនឹងត្រូវដឹកនាំដោយរដ្ឋមន្ត្រីការបរទេសទួរគី លោក Hakan Fidan ហើយត្រូវបានគេរំពឹងថា នឹងមានការប្រមូលផ្តុំមន្ត្រីជាន់ខ្ពស់មកពីប្រទេសទាំង៣។ នាយកអង្គភាពចារកម្មជាតិ (MIT) របស់ប្រទេសទួរគី លោក Ibrahim Kalin ក៏គ្រោងនឹងចូលរួមផងដែរ។

គណៈប្រតិភូរុស្ស៊ីដែលចូលរួមក្នុងកិច្ចប្រជុំនេះ រួមមានទីប្រឹក្សាលោកប្រធានាធិបតី Vladimir Putin គឺលោក Vladimir Medinsky អនុរដ្ឋមន្ត្រីក្រសួងការបរទេស លោក Mikhail Galuzin អនុរដ្ឋមន្ត្រីក្រសួងការពារជាតិ លោក Aleksandr Fomin និងប្រមុខអគ្គនាយកដ្ឋានចារកម្ម លោក Igor Kostyukov។

ចំណែកគណៈប្រតិភូអ៊ុយក្រែន រួមមានរដ្ឋមន្ត្រីការពារជាតិ លោក Rustem Umerov អនុរដ្ឋមន្ត្រីការបរទេសលោក Sergiy Kyslytsya អនុប្រធានទីភ្នាក់ងារសន្តិសុខ លោក Oleksandr Poklad និងអនុប្រធានទីភ្នាក់ងារចារកម្មបរទេស លោក Oleh Luhovskyi ។

ភ្លាមៗបន្ទាប់ពីសង្គ្រាមបង្ហូរឈាម បានចាប់ផ្តើមនៅខែកុម្ភៈឆ្នាំ២០២២ ទួរគីបាននាំប្រទេសរុស្ស៊ី និងអ៊ុយក្រែនមកអង្គុយរួមគ្នានៅតុតែមួយ នៅទីក្រុង Antalya និងអ៊ីស្តង់ប៊ុល ក្នុងឆ្នាំតែមួយ ហើយក្នុងខែឧសភា ឆ្នាំ២០២៥ នេះ ប្រទេសនេះបាននាំគណៈប្រតិភូរុស្ស៊ី និងអ៊ុយក្រែនមកអង្គុយជុំតុតែមួយជាថ្មីម្តងទៀត នៅអ៊ីស្តង់ប៊ុល ពោលគឺបន្ទាប់ពីរយៈពេល ៣ឆ្នាំ។

ការចរចា រវាងរុស្ស៊ី និងអ៊ុយក្រែន បានធ្វើឡើងនៅថ្ងៃទី១៦ ខែឧសភា នៅឯការិយាល័យប្រធានាធិបតី Dolmabahce ក្នុងទីក្រុងអ៊ីស្តង់ប៊ុល។ ភាគីទាំង២ បានព្រមព្រៀងដោះដូរអ្នកទោសសង្គ្រាមចំនួន ១.០០០នាក់នៃភាគីនីមួយៗ បង្ហាញទស្សនៈលម្អិត ស្តីពីបទឈប់បាញ់ដែលអាចកើតមាន ហើយបន្ទាប់មកបន្តការចរចា។ 

ហើយប្រទេសទាំង២ បានប្រកាសថា ការដោះដូរអ្នកទោសដែលបានព្រមព្រៀងគ្នានៅទីក្រុងអ៊ីស្តង់ប៊ុលត្រូវបានបញ្ចប់នៅថ្ងៃទី២៥ ខែឧសភា៕