តាមរយៈការបង្ហោះនៅលើបណ្ដាញសង្គម X នាថ្ងៃចន្ទ (ទី២ ខែមិថុនា) នេះ ដោយដកស្រង់ទិន្នន័យពីមូលនិធិកុមាររបស់អង្គការសហប្រជាជាតិ ឬអង្គការយូនីសេហ្វ (UNICEF) ទីភ្នាក់ងារជំនួយ និងការងាររបស់អង្គការសហប្រជាជាតិ សម្រាប់ជនភៀសខ្លួនប៉ាឡេស្ទីន (UNRWA) បានឲ្យដឹងថា កុមារជាង ៥០.០០០នាក់ នៅតំបន់ហ្កាហ្សា ត្រូវបានសម្លាប់ ឬត្រូវបានធ្វើឲ្យមានរបួស គិតចាប់តាំងពីខែតុលា ឆ្នាំ២០២៣ មក។

UNRWA បានលើកឡើងនៅក្នុងការបង្ហោះនោះថា៖ «យោងទៅតាមអង្គការយូនីសេហ្វបានឲ្យដឹងថា ក្មេងទាំងប្រុស និងស្រីមិនតិចជាង ៥០.០០០នាក់ ត្រូវបានសម្លាប់ ឬត្រូវបានធ្វើឲ្យមានរបួស ក្នុងរយៈពេលត្រឹមតែ ២០ខែប៉ុណ្ណោះ»។ ទីភ្នាក់ងារនេះបានបន្ថែមថា៖ «ជនស៊ីវិល ដែលរួមមានក្មេងៗ បុគ្គលិកមនុស្សធម៌ និងពេទ្យ អ្នកឆ្លើយតបដំបូង ហើយនិងអ្នកសារព័ត៌មាន នៅតែបន្តស្លាប់ និងរងរបួស នៅតំបន់ហ្កាហ្សាស្ទ្រីប»។

គួរបញ្ជាក់ថា តាមរយៈការចេញផ្សាយតួលេខជនរងគ្រោះដែលជាកុមារ នៅក្នុងអត្ថបទមួយ កាលពីថ្ងៃទី២៧ ខែឧសភា អង្គការយូនីសេហ្វបានឲ្យដឹងថា កុមារ នៅតំបន់ហ្កាហ្សា កំពុងទទួលរងនូវ «ភាពភ័យរន្ធត់ដែលមិនអាចប៉ាន់ស្មានបានរយៈពេលវែង ដែលមានដូចជា ការរំលោភបំពានយ៉ាងធ្ងន់ធ្ងរលើកុមារ ការរារាំងជំនួយ ភាពអត់ឃ្លាន ការផ្លាស់ទីលំនៅដោយបង្ខំឥតឈប់ឈរ ហើយនិងការបំផ្លិចបំផ្លាញមន្ទីរពេទ្យ ប្រព័ន្ធទឹក សាលារៀន និងផ្ទះសម្បែង»។

អង្គការយូនីសេហ្វបានឲ្យដឹងថា៖ «កុមារនៃតំបន់ហ្កាហ្សាត្រូវការការការពារ។ ពួកគេត្រូវការអាហារ ទឹក និងថ្នាំ។ ពួកគេត្រូវការបទឈប់បាញ់។ ប៉ុន្តែលើសពីអ្វីទាំងអស់ ពួកគេត្រូវការសកម្មភាពរួមបន្ទាន់ ដើម្បីបញ្ឈប់ស្ថានភាពនេះតែម្តង និងសម្រាប់ទាំងអស់គ្នា»៕