ភ្នំពេញ៖ ក្នុងរយៈពេល៣ឆ្នាំមកនេះ អង្គការវ័នរ៉ូដ បានចុះទៅតាមសាលា ក្នុងតំបន់ជនបទ​ចំនួន​៥៥​សាលា នៅក្នុងស្រុក នៃខេត្តមួយចំនួន រួមទាំងនាំយកជាសម្ភារៈសិក្សា និងអំណោយ​មួយ​ចំនួន​ទៀត ផ្ដល់ដល់សិស្សានុសិស្សនៅតាមសាលាទាំងអស់នោះ ប្រមាណជាង ២ម៉ឺននាក់ ខណៈ​ដែល​សកម្មភាពសប្បុរសធម៌នេះ ក៏បានចូលរួមចំណែកជំរុញមិត្តភាពរវាងកម្ពុជា-ចិន ឲ្យ​កាន់​តែរឹ​ងមាំបន្ថែមទៀត ។

ក្នុងថ្ងៃអបអរសាទខួបលើកទី៧៦ ទិវាកុមារអន្តរជាតិ ១មិថុនា អង្គការវ័នរ៉ូដ ក៏បានធ្វើ​ពិធី​រំលឹក​ខួប​៣ឆ្នាំ នៃសកម្មភាពមនុស្សធម៌របស់ខ្លួន កាលពីថ្ងៃទី១ ខែមិថុនា ឆ្នាំ២០២៥ ដោយ​មាន​ការ​អញ្ជើញ​ចូល​រួមពីសំណាក់ឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវ ព្រម​ទាំង​ឯកឧត្តម វ៉ា ថន អភិបាលខេត្តក្រចេះ និងលោក ឡោ ខេវិន អគ្គនាយកក្រុមហ៊ុនវ័នរ៉ូដគ្រុប និង​ជា​ប្រធានអង្គការមូលនិធិសប្បុរសធម៌វ័នរ៉ូដ និងក្រុមការងារវ័នរ៉ូដ នៅទីតាំង​សាលា​បឋម​សិក្សា​ព្រះ​គ្រូគឹ​មឯម ស្ថិតនៅឃុំព្រែកប្រសព្វ ស្រុកព្រែកប្រសព្វ ខេត្តក្រចេះ រួមទាំងមានការ​ចែក​សម្ភារៈ​សិក្សា និងកីឡាជូនដល់សិស្សានុសិស្សផងដែរ ។

នៅក្នុងកម្មពិធីសប្បុរសធម៌នេះ លោក ឡោ ខេវិន បានលើកឡើងថា រយៈពេល៣ឆ្នាំនេះ ចាប់ពី “ការរួមដំណើរជាមួយគ្នាដំបូង” ទៅជា “ការរួមដំណើរដោយយល់ចិត្តបន្តរហូតមកនេះ វ័នរ៉ូដ បាន​គាំទ្រ​ការ​អប់រំ បន្តក្ដីស្រលាញ់ ទទួលបានមិត្តភាព បង្កើតទំនាក់ទំនង ហើយបាន​បន្ត​បំពេញ​សកម្មភាព​សប្បុរសធម៌ជាប្រចាំ ដោយមានការចូលរួមពីស្ថានប័នរដ្ឋជាច្រើន ដូចជា ក្រសួង​ពាណិជ្ជ​កម្ម ក្រសួងព័ត៌មាន ក្រសួងបរិស្ថាន និងនាយកដ្ឋានអភិវឌ្ឍន៍នៃក្រសួងការពារជាតិ ។

គួរបញ្ជាក់ថា ចាប់តាំងពីឆ្នាំ២០២២ វ័នរ៉ូដ គ្រុប បានអនុវត្តសកម្មភាពសប្បុរសធម៌ជាប្រចាំខែ ចាប់​ពី​ការផ្តល់សម្ភារៈសិក្សាដល់សាលារៀនខ្វះខាត រហូតដល់​ការ​ជួយ​ជួស​ជុល​គ្រឿង​បរិក្ខារ​ក្នុង​សាលា​រៀន ហើយមកដល់ពេលនេះ បានផ្តល់កាតាបសិក្សាដល់សិស្សចំនួនជាង ២ម៉ឺនកាតាប តុ​ប៉េង​ប៉ុង​ចំនួន៨២ តារាងបាល់ទាត់ចំនួន៤៥ និងបាល់បោះបាល់ទាត់សរុបជាង២០០ ។ បន្ថែម​ពីនេះ អង្គការវ័នរ៉ូដ ក៏បានជួយឧបថម្ថកាអណ្តូងទឹកចំនួន ៣៩អណ្តូង និង​ដំឡើង​អំពូល​ភ្លើង​សូឡា​ចំនួ​ន ៨០ដើមដល់សាលារៀន៕ អត្ថបទ បាន សុខរិទ្ធិ