រុស្ស៊ី បានប្រាប់អ៊ុយក្រែនក្នុងកិច្ចចរចាសន្តិភាពកាលពីថ្ងៃចន្ទ ២ មិថុនា ថា ខ្លួននឹងយល់ព្រមបញ្ចប់សង្គ្រាម ប្រសិនបើទីក្រុងគៀវ បោះបង់ចោលផ្នែកទឹកដីថ្មីធំៗ ហើយទទួលយកដែនកំណត់លើទំហំនៃកងទ័ពរបស់ខ្លួន នេះបើយោងតាមអនុស្សរណៈដែលបានរាយការណ៍ដោយប្រព័ន្ធផ្សព្វផ្សាយរុស្ស៊ី។

លក្ខខណ្ឌដែលបានបង្ហាញជាផ្លូវការនៅក្នុងការចរចានៅទីក្រុងអ៊ីស្តង់ប៊ុល ប្រទេសទួរគី បានគូសបញ្ជាក់ពីការបដិសេធរបស់ទីក្រុងមូស្គូក្នុងការសម្របសម្រួលលើគោលដៅសង្រ្គាមយូរអង្វែងរបស់ខ្លួន ទោះមានការអំពាវនាវដោយប្រធានាធិបតីអាមេរិកលោក Donald Trump ឱ្យបញ្ចប់ការបង្ហូរឈាមនៅអ៊ុយក្រែនក៏ដោយ។

អ៊ុយក្រែនបានបដិសេធម្តងហើយម្តងទៀតចំពោះលក្ខខណ្ឌរបស់រុស្ស៊ីថាជាការចង់ឲ្យខ្លួនសុំចុះចាញ់។

គណៈប្រតិភូមកពីភាគីជម្លោះបានជួបប្រជុំគ្នាត្រឹមតែមួយម៉ោងប៉ុណ្ណោះ សម្រាប់ការចរចាលើកទីពីរចាប់តាំងពីខែមីនា ឆ្នាំ ២០២២ ។

ពួកគេបានយល់ព្រមដោះដូរឈ្លើយសឹកមបន្ថែមទៀត ដោយផ្តោតលើអ្នករបួសក្មេងជាងគេ និងធ្ងន់ធ្ងរបំផុត ហើយប្រគល់សាកសពទាហានដែលបានស្លាប់ចំនួន ១២.០០០នាក់មកវិញ។  

ប្រធានាធិបតីទួរគីលោក Tayyip Erdogan បានហៅការជួបជុំនោះថាជាកិច្ចប្រជុំដ៏ល្អមួយ ហើយបាននិយាយថា លោកសង្ឃឹមថានឹងនាំយកលោក Vladimir Putin និងលោក Volodymyr Zelenskyyចូលតុចរចាសម្រាប់កិច្ចប្រជុំជាមួយលោក Trump នៅក្នុងប្រទេសទួរគី៕