ប្រជាជនកូរ៉េខាងត្បូង រាប់លាននាក់បានចាប់ផ្តើមចេញទៅបោះឆ្នោតនៅថ្ងៃអង្គារ (០៣ មិថុនា) នេះ ដើម្បីជ្រើសរើសប្រធានាធិបតីថ្មី ដោយលុបបំបាត់ភាពចលាចលនយោបាយរយៈពេល ៦ខែ បន្ទាប់ពីការប្រកាសច្បាប់អាជ្ញាសឹកដ៏ចម្រូងចម្រាសរបស់អតីតមេដឹកនាំ លោក Yoon Suk Yeol។

អ្នកបោះឆ្នោតជាច្រើនបានតម្រង់ជួរនៅការិយាល័យបោះឆ្នោតក្នុងតំបន់នានាចំនួន១៤.២៩៥កន្លែងទូទាំងប្រទេស នៅម៉ោង ៦ព្រឹក (ម៉ោងក្នុងស្រុក) ដើម្បីទម្លាក់សន្លឹកឆ្នោតរបស់ពួកគេ ហើយនឹងបិទបញ្ចប់នៅម៉ោង ៨យប់។ គណៈកម្មាធិការជាតិរៀបចំការបោះឆ្នោតនិយាយថា មនុស្សរាប់លាននាក់បានបោះឆ្នោតរួចរាល់ហើយនៅក្នុងការបោះឆ្នោតមុនអាណត្តិនេះ ដោយមើលឃើញអ្នកចុះឈ្មោះបោះឆ្នោតច្រើនជាងមួយភាគបី កាលពីសប្តាហ៍មុន ក្នុងអំឡុងពេលពីរថ្ងៃនៃការបោះឆ្នោតមុនពេលកំណត់។

ការស្ទង់មតិសំខាន់ៗទាំងអស់បានដាក់លោក Lee Jae-myung មានក្រុមសេរីនិយម ឱ្យនាំមុខគេក្នុងចំណោមបេក្ខភាពទាំងអស់ ដោយការស្ទង់មតិចុងក្រោយបង្អស់របស់ Gallup បង្ហាញថាអ្នកឆ្លើយសំណួរចំនួន ៤០% បានចាត់ទុកលោកជាបេក្ខជនល្អបំផុត។ លោក Kim Moon-soo មកពីក្រុមអភិរក្សនិយម ដែលជាអតីតគណបក្សរបស់លោក Yoon បានតាមពីក្រោយលោក Lee ក្នុងអត្រា ៣៥%។

ក្រុមអ្នកជំនាញនិយាយថា ភាពចម្រូងចម្រាសនៃច្បាប់អាជ្ញាសឹក ដែលធ្វើឱ្យកូរ៉េខាងត្បូង បាត់បង់ថ្នាក់ដឹកនាំយ៉ាងមានប្រសិទ្ធភាព ជាពិសេសកើតឡើងនៅក្នុងខែដំបូងនៃអាណត្តិទីពីររបស់លោកប្រធានាធិបតីអាមេរិក Donald Trump គឺជាក្ដីកង្វល់ចម្បងសម្រាប់អ្នកបោះឆ្នោត។ នៅក្នុងការបោះឆ្នោតមុនអាណត្តិបែបនេះ អ្នកឈ្នះនឹងក្លាយជាប្រធានាធិបតីភ្លាមៗ នៅពេលគណៈកម្មាធិការជាតិរៀបចំការបោះឆ្នោតផ្តល់សច្ចាប័នលើចំនួនសរុបសន្លឹកឆ្នោត នៅពេលពាក់កណ្តាលអធ្រាត្ររំលងថ្ងៃបោះឆ្នោតនេះ៕