ជុំទីពីរនៃកិច្ចចរចាសន្តិភាពដោយផ្ទាល់រវាងរុស្ស៊ី និងអ៊ុយក្រែន នៅទីក្រុងអ៊ីស្តង់ប៊ុល ប្រទេសទួរគី នាថ្ងៃចន្ទ (០២ មិថុនា) សប្ដាហ៍នេះ បានបញ្ចប់ដោយពុំមានការទម្លាយភាពជាប់គាំងធំដុំអ្វីទេ រួមទាំងបទឈប់បាញ់ក្នុងសង្រ្គាមដ៏បង្ហូរឈាម ហើយមានតែកិច្ចព្រមព្រៀងមួយដើម្បីផ្លាស់ប្តូរឈ្លើយសឹកបន្ថែមទៀតប៉ុណ្ណោះ។

ក្រុមអ្នកចរចាអ៊ុយក្រែននិយាយថា រុស្ស៊ីបានច្រានចោលម្តងទៀតនូវ "បទឈប់បាញ់ដោយគ្មានលក្ខខណ្ឌ" ដែលជាការទាមទារដ៏សំខាន់ដោយទីក្រុងគីវ និងសម្ព័ន្ធមិត្តរបស់ខ្លួននៅអឺរ៉ុប និងសហរដ្ឋអាមេរិក ប៉ុន្តែភាគីជម្លោះទាំងពីរបានប្តេជ្ញាថានឹងប្រគល់សាកសពទាហាន ១២.០០០នាក់ទៅវិញ។

ក្រុមរុស្ស៊ីនិយាយថា ខ្លួនបានស្នើឱ្យមានបទឈប់បាញ់ពីរ ឬបីថ្ងៃ "នៅក្នុងតំបន់ជាក់លាក់" នៃជួរមុខដ៏ធំល្វឹងល្វើយ ប៉ុន្តែមិនផ្តល់ព័ត៌មានលម្អិតបន្ថែមទេ។ នៅក្នុងកិច្ចពិភាក្សាថ្ងៃចន្ទ ដែលមានរយៈពេលជាងមួយម៉ោងនោះ ភាគីទាំងពីរបានយល់ព្រមផ្លាស់ប្តូរឈ្លើយសឹកទាំងអស់ដែលមានជំងឺ និងរងរបួសធ្ងន់ធ្ងរ ក៏ដូចជាអ្នកដែលមានអាយុក្រោម ២៥ឆ្នាំ។

ការរំពឹងទុកនៃវឌ្ឍនភាពមានកម្រិតទាបស្រាប់ទៅហើយ សូម្បីតែមុនពេលកិច្ចចរចាបានចាប់ផ្តើមទោទៀត ដោយភាគីទាំងពីរបានខ្វែងគំនិតគ្នាយ៉ាងជ្រៅពីវិធីសាស្រ្តបញ្ចប់សង្រ្គាម ដែលកំពុងផ្ទុះឡើងយ៉ាងខ្លាំងក្លា ចាប់តាំងពីរុស្ស៊ី ចាប់ផ្តើមប្រតិបត្តិការយោធាលើអ៊ុយក្រែន ក្នុងខែកុម្ភៈ ឆ្នាំ២០២២មក៕