ប្រមុខអង្គការសហប្រជាជាតិ លោក Antonio Guterres បានអំពាវនាវកាលពីថ្ងៃចន្ទ សម្រាប់ការស៊ើបអង្កេតឯករាជ្យមួយលើការស្លាប់និងរងរបួសពលរដ្ឋប៉ាឡេស្ទីនជាច្រើននាក់ នៅជិតមជ្ឈមណ្ឌលផ្តល់ជំនួយគាំទ្រដោយសហរដ្ឋអាមេរិក នៅតំបន់ហ្កាហ្សា កាលពី២ថ្ងៃកន្លងទៅនេះ។

ទីភ្នាក់ងារការពារជនស៊ីវិលនៅតំបន់ហ្កាហ្សា បាននិយាយថា ការបាញ់ប្រហារដោយកាំភ្លើងរបស់អ៊ីស្រាអែល បានសម្លាប់មនុស្សយ៉ាងហោចណាស់៣១នាក់ និងរបួស១៧៦នាក់ នៅជិតទីតាំងចែកចាយជំនួយក្នុងទីក្រុង Rafah ភាគខាងត្បូង កាលពីថ្ងៃអាទិត្យ ដោយក្រុមគ្រូពេទ្យសង្គ្រោះបឋមនៅមន្ទីរពេទ្យក្បែរនោះ បានរាយការណ៍ពីចំនួនដ៏ច្រើននៃជនរងគ្រោះដោយគ្រាប់កាំភ្លើង។

យោធាអ៊ីស្រាអែល បានបដិសេធការបាញ់ប្រហារទៅលើប្រជាជន ខណៈពួកគេនៅជិត ឬក្នុងតំបន់នោះ។ប៉ុន្តែប្រភពពីយោធាបានទទួលស្គាល់ថា «ការបាញ់ព្រមាន ត្រូវបានបាញ់ទៅលើជនសង្ស័យជាច្រើននាក់» នៅពេលយប់ ក្នុងចម្ងាយប្រហែល១គីឡូម៉ែត្រ។

លោក Guterres បាននិយាយនៅក្នុងសេចក្តីថ្លែងការណ៍ថា «ខ្ញុំមានការរន្ធត់ចិត្តចំពោះរបាយការណ៍ស្តីពីពលរដ្ឋប៉ាឡេស្ទីនដែលត្រូវបានសម្លាប់ និងរងរបួស ខណៈកំពុងស្វែងរកជំនួយនៅតំបន់ហ្កាហ្សា កាលពីថ្ងៃអាទិត្យ។ វាមិនអាចទទួលយកបានទេ ដែលពលរដ្ឋប៉ាឡេស្ទីនកំពុងប្រថុយជីវិតរបស់ពួកគេដើម្បីស្បៀងអាហារ»។ «ខ្ញុំសូមអំពាវនាវឱ្យមានការស៊ើបអង្កេតជាបន្ទាន់និងឯករាជ្យ លើហេតុការណ៍ទាំងនេះ និងអ្នកប្រព្រឹត្តត្រូវបាននាំមកឲ្យទទួលខុសត្រូវ»។ ក្រសួងការបរទេសប្រទេសអ៊ីស្រាអែល បានចាត់ទុកសេចក្តីថ្លែងការណ៍នេះថា «ជាការអាម៉ាស់» ហើយបានបន្ទោសលោក Guterres ចំពោះការមិនរិះគន់ក្រុមហាម៉ាស។