រដ្ឋបាលរបស់លោកប្រធានាធិបតី Donald Trump បានស្នើដល់តុលាការកំពូលសហរដ្ឋអាមេរិក កាលពីថ្ងៃចន្ទ (០២ មិថុនា) ឱ្យបញ្ឈប់ដីកាតុលាការ ដែលបានរារាំងការកាត់រំសាយការងារទ្រង់ទ្រាយធំ និងការរៀបចំរចនាសម្ព័ន្ធទីភ្នាក់ងារឡើងវិញ ដែលជាផ្នែកនៃយុទ្ធនាការរបស់ប្រធានាធិបតីមកពីសាធារណរដ្ឋរូបនេះដើម្បីកាត់បន្ថយទំហំរដ្ឋាភិបាល។

សំណើចេញពីក្រសួងយុត្តិធម៌នេះ បានធ្វើឡើងបន្ទាប់ពីចៅក្រមប្រចាំតំបន់សហរដ្ឋអាមេរិក មានមូលដ្ឋាននៅទីក្រុង San Francisco លោកស្រី Susan Illston បានរារាំងការបញ្ឈប់បុគ្គលិកសហព័ន្ធទ្រង់ទ្រាយធំ ដែលត្រូវបានគេស្គាល់ថាជា "ការកាត់បន្ថយកម្លាំងពលកម្ម" នៅក្នុងសេចក្តីសម្រេចកាលពីថ្ងៃទី២២ ខែឧសភា ដោយឈរខាងក្រុមសហជីព ក្រុមមិនរកប្រាក់ចំណេញ និងរដ្ឋាភិបាលមូលដ្ឋានដែលជំទាស់នឹងការកាត់បុគ្គលិករដ្ឋបាល។

ករណីនេះពាក់ព័ន្ធនឹងក្រសួងកសិកម្ម ពាណិជ្ជកម្ម សុខាភិបាល កិច្ចការរដ្ឋ រតនាគារ និងអតីតយុទ្ធជនរបស់សហរដ្ឋអាមេរិក។ ក្រសួងយុត្តិធម៌បាននិយាយនៅក្នុងសំណើឯកសារនោះថា ការគ្រប់គ្រងបុគ្គលិកនៃទីភ្នាក់ងារសហព័ន្ធ "ជាចំណុចសំខាន់បំផុត" នៃអំណាចប្រធានាធិបតី។

តុលាការកំពូលបានស្នើការឆ្លើយតបពីដើមបណ្តឹងក្នុងសំណុំរឿងនេះ ទៅនឹងសំណើរបស់រដ្ឋបាលត្រឹមថ្ងៃទី០៩ ខែមិថុនា ខាងមុខ។ គួរឱ្យដឹងថា លោក Trump បានបញ្ជាទីភ្នាក់ងារសហព័ន្ធនានានៅក្នុងខែកុម្ភៈ ឱ្យ "រៀបចំភ្លាមៗដើម្បីផ្តួចផ្តើមការកាត់បន្ថយបុគ្គលិកជាធរមានក្នុងទ្រង់ទ្រាយធំ" ដែលជាផ្នែកមួយនៃផែនការរៀបចំរចនាសម្ព័ន្ធឡើងវិញរបស់រដ្ឋបាលលោក៕