ប្រធានាធិបតីសហរដ្ឋអាមេរិក លោក Donald Trump កាលពីថ្ងៃចន្ទ បានបដិសេធការអនុញ្ញាតឱ្យអ៊ីរ៉ង់ ចម្រាញ់សារធាតុអ៊ុយរ៉ានីញ៉ូម ក្រោមកិច្ចព្រមព្រៀងនុយក្លេអ៊ែរណាមួយឡើយ ខណៈទីក្រុងតេអេរ៉ង់ បានការពារនូវអ្វីដែលខ្លួនបាននិយាយថា ជាការស្វែងរកឥន្ធនៈសម្រាប់ផលិតថាមពលដោយ «សន្តិវិធី» ។

ការចម្រាញ់សារធាតុអ៊ុយរ៉ានីញ៉ូម នៅតែជាចំណុចសំខាន់នៃភាពមិនចុះសម្រុងគ្នា នៅក្នុងកិច្ចចរចាចំនួន៥ជុំ ចាប់តាំងពីខែមេសា ដើម្បីចុះហត្ថលេខាលើកិច្ចព្រមព្រៀងថ្មីមួយជំនួសកិច្ចព្រមព្រៀងជាមួយប្រទេសមហាអំណាចធំៗដែលលោក Trump បានបោះបង់ចោលក្នុងអំឡុងពេលអាណត្តិដំបូងរបស់លោកក្នុងឆ្នាំ២០១៨ ។

«ក្រោមកិច្ចព្រមព្រៀងដ៏មានសក្តានុពលរបស់យើង យើងនឹងមិនអនុញ្ញាតឱ្យមានការចម្រាញ់សារធាតុអ៊ុយរ៉ានីញ៉ូមណាមួយឡើយ!» លោក Trump បាននិយាយនៅលើបណ្តាញសង្គម Truth Social របស់លោកបន្ទាប់ពីសារព័ត៌មាន Axios បាននិយាយថា ការផ្តល់ឲ្យរបស់ទីក្រុងវ៉ាស៊ីនតោននឹងអនុញ្ញាតឱ្យទីក្រុងតេអេរ៉ង់ចម្រាញ់ឥន្ធនៈនុយក្លេអ៊ែរមួយចំនួនប៉ុណ្ណោះ។

លោក Trump មកពីគណបក្សសាធារណរដ្ឋ បានស្តីបន្ទោសអ្នកកាន់តំណែងមុន លោក Joe Biden ចំពោះភាពជាប់គាំងដោយនិយាយថាគណបក្សប្រជាធិបតេយ្យ «គួរតែបញ្ឈប់អ៊ីរ៉ង់ជាយូរមកហើយពី ការចម្រាញ់សារធាតុអ៊ុយរ៉ានីញ៉ូម»។ ថ្លែងនៅទីក្រុងគែរ ប្រទេសអេហ្ស៊ីប ជាកន្លែងដែលលោកបានជួបជាមួយប្រធានអង្គការឃ្លាំមើលនុយក្លេអ៊ែររបស់អង្គការសហប្រជាជាតិ លោក Rafael Grossi រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា «ប្រសិនបើគោលដៅ ត្រូវដកសិទ្ធិអ៊ីរ៉ង់ពីសកម្មភាពដោយសន្តិវិធីរបស់ខ្លួន នោះប្រាកដជាគ្មានកិច្ចព្រមព្រៀងណាមួយនឹងសម្រេចបានឡើយ»។