ប្រធានាធិបតីអ៊ុយក្រែន លោក Volodymyr Zelenskiy បាននិយាយនៅក្នុងសន្និសីទសារព័ត៌មានតាមបណ្តាញអ៊ីនធឺណិតកាលពីថ្ងៃចន្ទ ទី២ ខែមិថុនា ថា គណៈប្រតិភូរបស់លោកនៅក្នុងកិច្ចចរចានៅទីក្រុងអ៊ីស្តង់ប៊ុល ប្រទេសទួរគី បានផ្តល់បញ្ជីឈ្មោះកុមារជិត៤០០នាក់ ដែលខ្លួនចង់ឱ្យរុស្ស៊ីប្រគល់ត្រឡប់មកវិញ ប៉ុន្តែគណៈប្រតិភូរុស្ស៊ី បានព្រមព្រៀងធ្វើការលើការប្រគល់កុមារត្រឡប់វិញត្រឹមតែ១០នាក់ប៉ុណ្ណោះ។

លោក Zelenskiy បាននិយាយដូច្នេះនៅក្នុងសន្និសីទសារព័ត៌មានតាមប្រព័ន្ធអ៊ីនធឺណិត បន្ទាប់ពីបានចូលរួមក្នុងកិច្ចប្រជុំរបស់សម្ព័ន្ធយោធាណាតូនៅទីក្រុង Vilnius ប្រទេសលីទុយអានី និងបន្ទាប់ពីគណៈប្រតិភូ បានជួបប្រជុំគ្នាសម្រាប់កិច្ចចរចាសន្តិភាពជុំទីពីរ នៅក្នុងប្រទេសទួរគី។

មេដឹកនាំអ៊ុយក្រែនរូបនេះ ក៏បាននិយាយសំដៅទៅលើប្រតិបត្តិការចារកម្មរបស់អ៊ុយក្រែនកាលពីថ្ងៃអាទិត្យ ទី១ មិថុនា ដែលយានដ្រូនបានវាយប្រហារនៅមូលដ្ឋានអាកាសរបស់រុស្ស៊ី។

លោកបាននិយាយថាប្រតិបត្តិការនេះ បានជួយស្តារទំនុកចិត្តរបស់ដៃគូ ដែលថាអ៊ុយក្រែនអាចបន្តធ្វើសង្រ្គាមរបស់ខ្លួនប្រឆាំងការឈ្លានពានរបស់រុស្ស៊ី។