ក្រុមអ្នកវិភាគ និងអ្នកការទូត បាននិយាយកាលពីថ្ងៃចន្ទ (០២ មិថុនា) ថា ជ័យជម្នះរបស់អ្នកនយោបាយជាតិនិយម លោក Karol Nawrocki នៅក្នុងការបោះឆ្នោតប្រធានាធិបតីប៉ូឡូញ អាចនឹងធ្វើឱ្យទំនាក់ទំនងកាន់តែតានតឹងជាមួយអ៊ុយក្រែន និងបង្កើនអំណាចរបស់ក្រុមអភិរក្សនិយម ដែលបំផុសគំនិតដោយលោកប្រធានាធិបតី Donald Trump នៅអឺរ៉ុបកណ្តាល។

លោក Nawrocki ដែលរិះគន់សហភាពអឺរ៉ុបជាប្រវត្តិសាស្រ្ត បានឈ្នះឆ្នោតទល់នឹងអភិបាលក្រុងវ៉ាសូវី លោក Rafal Trzaskowski ដែលគាំទ្រដោយក្រុមចម្រុះ KO កំពុងកាន់អំណាច ហើយជ័យជម្នះនោះបានក្លាយជាការប៉ះទង្គិចដ៏ធំមួយដល់រដ្ឋាភិបាលគាំទ្រអឺរ៉ុបរបស់លោកនាយករដ្ឋមន្ត្រី Donald Tusk។

ខណៈនៅតែមានការប្តេជ្ញាចិត្តក្នុងការជួយកិច្ចខិតខំប្រឹងប្រែងរបស់អ៊ុយក្រែន ទល់នឹងសង្រ្គាមរបស់រុស្ស៊ី លោក Nawrocki បានប្រឆាំងយ៉ាងម៉ឺងម៉ាត់នឹងទីក្រុងគីវ ក្នុងការចូលរួមជាមួយសម្ព័ន្ធយោធាលោកខាងលិច ដូចជាអង្គការណាតូ ដែលបង្កជាបញ្ហាប្រឈមយ៉ាងធំដល់ទំនាក់ទំនងជាមួយអ៊ុយក្រែន និងសម្ព័ន្ធមិត្តប្លុកអឺរ៉ុបរបស់ខ្លួន។

លោក Nawrocki បានច្រានចោលការលើកឡើងដែលថាជំហររបស់លោកគឺគាំទ្ររុស្ស៊ី។ ប៉ុន្តែយុទ្ធនាការរបស់លោក ដែលគាំទ្រដោយគណបក្សប្រឆាំងជាតិនិយម PiS បានបង្កើនភាពធុញទ្រាន់ជាមួយនឹងជនភៀសខ្លួនអ៊ុយក្រែន ហើយនិងក្ដីបារម្ភថា ប៉ូឡូញ អាចនឹងត្រូវអូសទាញចូលទៅក្នុងសង្រ្គាមនៅព្រំដែន ដែលអ្នកបោះឆ្នោតប៉ូឡូញ ជាច្រើនភ័យព្រួយ៕