រដ្ឋាភិបាលអង់គ្លេស បានបង្ហាញយុទ្ធសាស្ត្រការពារជាតិរបស់ខ្លួនសម្រាប់ទសវត្សរ៍ក្រោយ។ រដ្ឋាភិបាលរបស់លោកនាយករដ្ឋមន្ត្រី Keir Starmer បាននឹងកំពុងពិនិត្យឡើងវិញនូវយុទ្ធសាស្ត្រការពារជាតិរបស់ប្រទេស ចាប់តាំងពីលោកចូលកាន់តំណែងក្នុងខែកក្កដា ឆ្នាំ២០២៤។ កាលពីថ្ងៃចន្ទ រដ្ឋាភិបាល បានដាក់ចេញវិធានការជាបន្តបន្ទាប់ដើម្បីប្រឆាំងនឹងអ្វីដែលខ្លួនហៅថាជាការគំរាមកំហែងភ្លាមៗ ពីសំណាក់ប្រទេសរុស្ស៊ី។

ទាំងនេះរួមមាន ការវិនិយោគទឹកប្រាក់១៥ពាន់លានផោន ឬប្រហែល២០ពាន់លានដុល្លារ ក្នុងកម្មវិធីក្បាលគ្រាប់នុយក្លេអ៊ែរអធិបតេយ្យ និងការសាងសង់នាវាមុជទឹកវាយប្រហារដើរដោយថាមពលនុយក្លេអ៊ែររហូតដល់ ១២គ្រឿង។ រដ្ឋាភិបាល ក៏មានផែនការបង្កើតកងទ័ពជើងទឹកកូនកាត់ ដែលប្រើប្រាស់នាវាចម្បាំង នាវាមុជទឹក និងនាវាស្វយ័ត ព្រមទាំងបង្កើនចំនួនកងទ័ពបំពេញភារកិច្ចពេញម៉ោង។

លោក Starmer បាននិយាយថា «យើងប្រឈមនឹងសង្រ្គាមនៅអឺរ៉ុប ហានិភ័យនុយក្លេអ៊ែរថ្មី ការវាយប្រហារតាមអ៊ីនធឺណិតរាល់ថ្ងៃ ការកើនឡើងការឈ្លានពានរបស់រុស្ស៊ីនៅក្នុងដែនទឹករបស់យើង និងការគំរាមកំហែងដល់ជើងមេឃរបស់យើង»។ លោកនិយាយថា មធ្យោបាយដ៏មានប្រសិទ្ធភាពបំផុតក្នុងការទប់ស្កាត់ការគំរាមកំហែងគឺត្រូវបង្ហាញថា ចក្រភពអង់គ្លេស បានត្រៀមខ្លួនរួចរាល់ដើម្បីផ្តល់សន្តិភាពតាមរយៈភាពខ្លាំង។

យោងតាមសេចក្តីប្រកាសចុងក្រោយបានឲ្យដឹងថា គោលដៅរបស់រដ្ឋាភិបាលក្នុងការចំណាយ៣ភាគរយនៃផលិតផលក្នុងស្រុកសរុបសម្រាប់វិស័យការពារជាតិក្នុងទសវត្សរ៍ឆ្នាំ២០៣០ នឹងត្រូវបានបំពេញ ប្រសិនបើ «លក្ខខណ្ឌសេដ្ឋកិច្ច និងសារពើពន្ធ អនុញ្ញាត»។ គណបក្សប្រឆាំង បានរិះគន់រដ្ឋាភិបាលដោយនិយាយថា វាមិនច្បាស់នោះទេថាតើកម្មវិធីនេះ នឹងត្រូវបានគេផ្តល់ហិរញ្ញវត្ថុដោយរបៀបណា។